O tamaiti foi e le taitai ona faatamala i le tausiga o le latou aiga, e ui lava o loo taufai nonofo tama i o latou lava aiga ma o latou taitoalua, ae e tailua lava i le masina ma o atu i tua e asi atu o latou matua ma avatu se faatauga, a o se seleni foi e tuu i le lima o le latou tina.
Ua toe mafaufau foi le fafine e toe faatu atu lona manao i lona toalua, e nofo ia mai lana galuega, ae o taimi uma e tau foufou ai le talanoa atu o Suli, e matua le fia faalogo lava Fono i lea mataupu.
Ua tonu nei i le mafaufau o Suli, e sili ai ona tuu loa atonu o se mea foi lea e fiafia i ai Fono ia e alu ese atu ai ma le fale. E ese mai le musu e nofo mai lana galuega, e le taitai ona tau iite le fafine i se mea faanoanoa o loo tupu i lona toalua, ona o le vaaia o uiga alofa faapelepele o le tamaloa i lana fanau aemaise foi lona toalua.
Peitai, o le tausaga e 2007 a o faagasolo taaloga a le Pasefika i Saute na faia atu i Samoa, o ina lona a faatoa aliae ai le tupua lilo a le tamaloa o Fono ua leva ma autausaga o tanutanumia.
E moni lava le upu, e leai lava se mea lilo e le faailoaina. Ua fiu lava le agasala e toe lafi, ua le mafai ua matua le agasala ua le lilo le tino i lona nofoaga na lafi ai. Ae leiloa foi le gutu faitala na molimoli maia lenei tala matuitui i si fafine o Suli.
Aua e le gata ina manino le aumaiga o le tala, ae na matua toe pupula lava ma Suli i faamaoniga, ua savali i le sefulu tausaga o fai le isi toalua faalilolilo o lona toalua, ae aunoa ma se tasi na ia iloa, vagana ai lava se uo mamae a le tamaloa o loo la faigaluega kamuta faatasi.
