Sa alualu ai pea le mafana a lenei aiga, ma ua faasolo lava foi ina iu aoga a tamaiti, ma ua faitoalua uma tama e toatolu. O le lelei o aoga a tamaiti ma lelei ai a latou aoga, sa faapena foi ona iu lelei ma a latou filifiliga i o latou taitoalua ua fai.
O nei iuga manuia uma o le aiga, ua matua mautinoa ai e tagata uma o le nuu, o se tasi lenei aiga ua matua mausali lona faavae. O le isi itu, o se aiga foi e malosi tele i le itu tau tapuaiga, lea foi ua atili ai ona atagia mai i se olaga fiafia o loo ola ai.
O loo faasolo pea le olaga fiafia o le aiga, ma i se tasi aso sa talanoa ai loa Suli i lona toalua, e sili ia ona malolo loa mai lana galuega, o lea ua amata ona faigaluega tamaiti ma o loo tele lava ina lava le latou faasoa i aso uma.
O se itu lea na tau fai ai sina tei o le fafine, aua sa iai i lona mafaufau o le a fiafia Fono i lana tonu lea. Peitai na matua manino mai lava le le fiafia o le tamaloa i lea manatu o lona toalua. Fai mai e le tatau ona la faalagolago fua i tamaiti o la foi e tau atinae le aiga o tamaiti, ae fai pea lo laua tiute aua o lea foi e lei iu lelei aoga a si a la tama teine.
Na lei toe finau malosi le fafine o Suli, ae ua faanoanoa ona o le auala na tali mai ai lona toalua. Ua faagasolo pea le olaga, ma e lei toe laga lava e le fafine lea mataupu, ae o loo ia matauina pea le iai o nai suiga ua tau aliali mai i lona toalua, aemaise o le finau pea e toaga i lana galuega e ui lava e iloa lelei e Suli le vaivai o lona toalua i lana galuega.
O le itu na sili ona mate gata ai e Suli e iai se mea e ono tulai mai lo la aiga, ona o tupe uma lava o le totogi o lona toalua, e le mafai ona soona faaaoga e le tamaloa se tupe seiloga lava ua aumai ia te ia ona faatoa faasoa faatasi ai lea.
Ua oo ina iu aoga a Vasati, ma nai lo le alu o le teine e toe faaauau lana aoga i le iunivesite a le atunuu lea sa maua ai lona avanoa, ae ua talanoa le teine i lona tina, o le a alu ia e saili sana galuega e amata ona faigaluega ai, atonu e sui ai loa le loto o lona tama ma nofo mai lana galuega kamuta.
