Pau le mea e faamautinoa e Fono e le faia e lona toalua, o le alu i uta i le vaomatua e fai mai ni feau e pei ona masani ai le toatele o fafine nofotane o le nuu. E le alu foi Suli i le sami e ui lava e taumafai isi fafine o le latou nuu e tauanau le fafine latou te o e fai sea pe fao tuitui, ae faataga fai lava isi mau faamolemolega a Suli ina ia le alu ai.
Na fiafia lava foi tuafafine o Fono ina ua toe tusi atu i ai le ulugalii, o lea ua toe sui le la tonu, o le a le o i le aiga o Suli, ae o le a nonofo pea latou i le aiga, ma o le loto tonu lava lena o teine uma, aua e ese le manumanu mai o teine i le toalua o le latou tuagane.
Na pau foi lea o se fafine nofotane, e tele ina faalavalava mai e tuafafine o lona toalua, ma aumai uma mea mo si ana fanau. Lona uiga, e ese le mafanafana o le nofogatane a Suli i le aiga o Fono Faaiuaso. O le ala foi lea o le faaamuia uma o isi fafine nofotane ia Suli, ona ai lava na o ia se fafine e ese le ola fiafia i totonu o le nuu.
Ua faasolo pea le mafutaga ma ua amata ona matutua uma le fanau a le ulugalii. E sosoo uma lava tausaga o tama matutua e toafa, ae tolu tausaga e va ai faatoa fanau le latou tuafafine ma o le uii foi lea, le teineititi o Vasati.
E moni lava foi e lei lelei ni aoaoga a le alii o Fono lea e ono toe mafaufau faalua ai se tamaitai ofisa pe a ia iloa ane, ae o le foliga atu lava ia i fafo o Fono, e matua le faatusalia foi i lona aulelei ma foliga momosi o se tamatane e momoo uma ane i ai le itupa vaivai. Ai foi o le mea lea ua moeiini ai lava Suli i le le lelei o se nanu a Fono, ae ua manao lava ma taumulimuli ai i lenei alii.
O le mea lena e maua uma ai e le teineititi o Vasani foliga lalelei o ona matua uma e toalua, ma o le atugaluga tele lea o le fafine o Suli, ona ua tuputupu ae lava lana tama o se teineititi aulelei, ma ua iloa foi e le fafine le tele o ni faafitauli o le a la faafetaiaia pe afai e le lelei ona putiputi si ana tama mai le tele o fanau tama a le nuu.
