E le mafai foi ona misi i le tamaloa aso fanau o lana fanau, lea e mautinoa lava e tatau lava ona fai se taumafataga faapitoa, ma valaaulia foi nisi aiga o le latou nuu e latou te taumamafa faatasi.
O le matau la a tagata o le nuu lenei o Matogi i le tamaloa o Fono, o se tagata e auau tele i lana fanau. Na tau iai le fuafuaga faapea afai a eave le tina o Fono i Niu Sila, o le a toe foi loa le aiga e nonofo latalata i matua o Suli i le itu Aana.
Peitai na toe sui le tonu ina ua toe mafaufau le ulugalii, ua toe o laua lea e vaaia mea i le aiga o Fono, aua ua taufai o uma tagata i Niu Sila ma Ausetalia. Lona uiga o le taimi e o ese atu ai, e iu ina toe foi ane ua ese nisi tagata ua fai atu mo latou mea na tigaina ai.
Ua leai se afaina ia Suli o lena tonu, o le mea taua o lea ua toe lava o latou ma Fono ma tamaiti le latou aiga, ua leai foi se toe tau popole i aso uma i se meatausami mo le toeaina ma le loomatua. O Suli o se fafine e ese le aulelei o ona foliga, e le o se tagata e lapoa pe paee tele, ae o se tino matagofie o se tamaitai Samoa e atagia mai foliga o lenei fafine.
Ai foi o le ala lea na fiafia ai lava tuafafine o le alii o Fono, ina ua sau lo latou tuagane e faailoa mai lana uotamaitai i o latou matua, aua na ofo tuafafine o Fono, pe na faapefea ona maua e lo latou tuagane faavalevalea e lei alu i se aoga, si nei tamaitai e fai o le aulelei, ae sa faigaluega lelei foi i se tasi o ofisa malaga i Apia.
Na nonofo loa Fono ma Suli, fai loa le faapelepelega a Fono i si teine e sili ai ona nofo ma lana galuega ae tausi lelei si a la fanau, ae faitalia lava ia ma tausi le latou aiga, aua e fai foi sina tupe lelei o galuega o loo fealuai solo ai Fono.
