Na laulogo uma le nuu o Matogi i le auauee a le fafine o Suli, ma lalau le amio leaga o lona toalua, ma lona salamo i le faaipoipoi i lenei tamaloa amio i manu, a o taumafai pea si ana fanau matutua ma o latou taitoalua e faaoleole le fafine ma tau faatoafilemu lona mafaufau lea ua matua masaesae i lagona o le faavauvau i le iuga ua oo i ai le latou aiga ma si ana fanau, talu ai le amio leaga o lona toalua.
O se aiga sa pei lava o le tele o aiga o le nuu. E le matua mauoa, e le matitiva foi, ae o se aiga sa tagi lava i lima le atiina ae o si o latou taumafai mai i mea uma o le soifuaga.
Ina ua nonofo le ulugalii lenei o Suli ma lona toalua le tamaloa o Fono, sa muamua see atu ma nonofo i le aiga o Fono, ona na augani le tamaloa i le fafine, e fia tausi i nai ona matua ua leai se isi e tausia. Na malie atoatoa i ai Suli, ma o ina foi na amata mai ai le la ulugalii.
O le aiga foi o Fono na fananau uma ai le la fanau e toalima, o tama uma e toafa ma le teine e toatasi. Ina ua maliu le tama o Fono, sa mananao mai loa ona tuafafine i Niu Sila, e avatu le latou tina latou te tausia, ae sei malolo foi si fafine ia o Suli ua afu lana tautua.
E ui lava ua mafana le mafutaga a Suli ma si loomatua o Fetalaiga, ae na fiafia foi Suli i lea tonu a tuafafine o lona toalua, ina ia maua ai foi se avanoa e tausi lelei ai si ana ia fanau, manu o lea ua leai le isi ana avega sa mamafa i lona mafaufau i aso uma.
O le tamaloa o Fono, o se tagata e faigaluega faufale, ma sa tele ina maua ana galuega i au kamuta a le latou nuu na feoai solo e fau falesa ma faleaoga o isi nuu. I le tele o taimi ia sa fealuai ai Fono i ana galuega, sa pei o sana mea fiafia le taimi e foi atu ai i le latou aiga ma feiloai ma si ona toalua ma lana fanau.
