O le tetee lea a le sui o le Tautua Samoa, Levaopolo Talatonu i le saunoaga a le Alii Palemia mo le taimi nei, le Susuga Tuilaepa Lupesoliai Sailele Malielegaoi, i le fesiligia ai e le Samoa Observer i le SamoaTel ma le mafuaaga ua vavaō ai le toatele pe aisea ua faatau ai i le na o le $27 miliona tala.
O finauga ua lagalagā i luga o ofisa faasalalau, nusipepa ma leitio, ua manatu ai nisi e pei foi ona saunoa i ai le Taitaiga o le Tautua Samoa, ua faatau tia‘i e le Malo lea aseta malosi ma o loo maua ai tupe a le atunuu.
O le mau a le Malo, ua leva ona tuu i luga o le Maketi le SamoaTel, ae na o le pau lea o le kamupani, le Blue Sky a Amerika Samoa o loo mafai ona faamalieina aiaiga o le faatauga o lea kamupani.
O le mau a le Alii Palemia, e lē o se aseta lea a le Malo o toe ola i le taimi nei. Ua tele tausaga o taumafai mai ma e lē o iai se foliga o agai i luga le atina‘e ua o se aseta mate.
“E lē o mate le SamoaTel ae o le tagata lea na faatauesea,” o le faamatalaga lea a Vaai Papu le Ta‘ita‘i o le Tautua Samoa.
O le finagalo o Levaopolo, e lē mafai ona faia e le Alii Palemia ia lafoga leaga e $5miliona tala le tupe maua a le SamoaTel i le tausaga faaletupe ua mae‘a atu.
O isi tausaga i ona tua atu na oo i le $2-$3 miliona tala tupe maua a le kamupani.
O se faamaumauga na maua e lo tatou ofisa i Samoa nei e faatatau i tupe maua ma tupe faaalu a le SamoaTel, na vaaia ai o loo iai lava le tupe maua faasili.
Peitai o le tausaga lea na tea nei lea na faamagalo ai e le Malo se aitalafu tele ua lē mafai e le SamoaTel ona ao mai i Matagaluega ma Faalapotopotoga a le Malo. E silia i le $30 miliona tala le tupe na aitalafu ai ia Ofisa o le Malo i le SamoaTel.
O le faamatalaga la a Levaopolo afai ua iai se tasi ua mate ai le aseta lea a le Malo, e tatau ona tuuaia le Alii Palemia ona o lea na ia lagolagoina le faamagaloga o lea aitalafu ae ua lē faamalosia le totogi atu e Ofisa o le Malo o lea tinoitupe tele ma faamautu ai le alualu i luma o atina‘e a le SamoaTel.
Ua alu foi le vaiaso o tea atu o faaali finagalo o le toatele faatatau i le faatauga lenei o le SamoaTel, o isi faitioga ua faasagasaga i le Blue Sky Communications le kamupani o fesootaiga televavave mai i Amerika Samoa lea ua tuu i ai le vaiaso lenei e mae‘a ua taunuu mai le tupe ua mae‘a sainia nei le feagaiga latou te faatauina ai le SamoaTel.
O faitioga nei ua lāga ai ma fesiligia poo malamalama le Malo i le pule o lea kamupani o loo taofia i suesuega i Amerika ona o ni soligatulafono tau tupe. Pe faamata na faamalieina uma e le Kamupani lenei aiaiga o le faatauga o le SamoaTel.
O le tali a le Alii Palemia ina ua tapā aiaiga, “… Aisea na lē tuuofo mai ai ni kamupani i totonu o Samoa e faatau ai le SamoaTel, sa iai lava le avanoa na ave i kamupani uma i Samoa ma le lalolagi atoa, latou te tuuofo mai ai, ae e mae‘a le tuuofoga e na o le tasi lava le kamupani lea sa iai”.
Ua iai foi lipoti faapea e 15 kamupani na amata lava tuuofoga o iai i le manaoga e faatau le SamoaTel, peitai e lei faamalieina aiaiga o le faatauga o le kamupani telefoni.
Na fesili le tusitala i le Tautua Samoa pe aisea ua tele ai le mau lafoga ua faia i le taimi lenei ae sa tatau ona tele ni faamatalaga e faia i le taimi o tālia se iuga o se kamupani e faataua le SamoaTel, o lea ua faigata auā ua mae‘a saini feagaiga ma konekarate ua faamaonia faaletulafono le gaioiga ua fai nei.
E na o Levaopolo Talatonu na maua ana faitioga i le amataga lava o le faatauga o le SamoaTel.
O le tali a le Afioga i le Aloalii, sa iai isi faitioga na laga ma ua tolu tausaga o lagalaga pea peitai ua fai lava le finagalo o le Malo ma faatau i lea tupe laititi le kamupani telefoni.
Ona pau le mau o loo unai pea e Levaopolo i le taimi lenei, e lē o se aseta mate le SamoaTel ma e manino e pei foi ona saunoa i ai le Minisita o Tupe i le tala faatatau o le Tupe i le lua tausaga talu ai, o le mafuaaga o le vaavaai o le Malo i le faatauga o le SamoaTel, ina ia maua ai se tupe e totogi ai aitalafu i fafo ma aumai se isi vaega e fesoasoani ai i le atina‘e o le atunuu.
O le saunoaga lea a Niko Lee-Hang i le Palemene. Ta‘ua e Levaopolo Talatonu atonu o le mafuaaga lea ua faatau ai lava le SamoaTel ae o le Minisita lava foi o Tupe na ia ta‘ua o loo valoia o le isi tausaga faaletupe e ono oo atu le alualu i luma o le tupe maua a le SamoaTel i le 4 pasene. Aisea la ua faatau ai i lenei taimi, na faaalia e Levaopolo o le misitelio tele lea o loo tulai mai.
