Ua faaalia e le lipoti lata mai o le gasegase o le chickungunya ua oo atu i le to‘a 4,431 le aofai o tagata i Samoa nei ua aafia i lenei gasegase ma ua mautu le fai ifo o le numera o tagata ua aafia i lenei taimi pe a faatusatusa atu i taimi na faatoa molimauina ai lenei gasegase.
O se pa‘ū ua matauina i lea vaiaso ma lea vaiaso talu mai Tesema o le tausaga na tea nei. O i latou lava mai i le 15 tausaga seia oo atu i le 34 tausaga le matutua lea na maualuga ai le numera lenei ae na oo lava i le matutua e sili atu i le 75 tausaga le matutua o i latou na aafia uma i lenei gasegase.
O loo faaauau lava le galuega a le matagaluega e ala i faalauiloa i luga o televise ma ua faaaogā foi ma feau tusitusia i luga o telefoni auā le lapatai ai o le atunuu i puipuiga o lenei gasegase.
O lea ua faapea mai le matagaluega o le a amata foi ona toe agai i le fanaina o nofoaga o loo matauina ai le maua ai pea o lenei gasegase ae o le feagai ai ma le vaitaimi o timuga o lea ua laga ai foi e le Matagaluega le tāua o le toe vaavaai o le atunuu i le aveese o nofoaga e tuufua ai le namu e pepesi ai lenei faama‘i.
O Niue lea ua faalauiloa mai e toatasi lana tagata ua faamaonia le maliu ai i lenei gasegase faatasi ai ma le toalima ua maliliu mai i Tahiti ae o Samoa sa iai masalosaloga i nisi na ono maliliu ona o le chikungunya ae o le faamatalaga a le Soifua Maloloina e lē faamaonia ia lipoti ona e tele isi gasegase na maua ai i latou ia na maliliu ae masalomia ai i le faama‘i pepesi lea.
O le lapataiga tāua ua ave i le atunuu e umi ona nofo le siama i le tino o le tagata pe tusa ma le tausaga le umi, ma e tatau lava ia i latou e maua ai ona mautinoa le faaeteete auā e faigofie ona toe aafia ai i le gasegase pe a lē lelei ona inu fualaau o meatiga poo panadols faatasi ai ma le suavai mamā.
