Ua faamautu mai e se tasi o tamalii o le Itumalo o Falealili, le faatautaia nei e se tasi o Kamupani o Niu Sila o se talosaga ina ia faatautaia ni a‘oa‘oga mo alii ma tamaitai mai i Samoa o loo malaga atu i Niu Sila i avanoa e galulue faavaitaimi ai i faatoaga o fua o fualaau aina.
O se taumafaiga ua maua ai nei le avanoa e a‘oa‘oina ai e lē gata i le gagana Peretania ae o le numera. Faaalia e Tuatagaloa Folasaitu Joe Annandale, o se tasi lea o fesoasoani ina ia mafai ai ona faaauau lenei auaunaga tāua o loo maua e Niu Sila mai i tagatānuu o Samoa mo taimi faatulagaina o le tausaga.
O lea ua toatele nisi o faalapotopotoga o tagata na galulue i Niu Sila i le amataga o lenei tausaga pe mai i le tausaga na tea nei, e tau fua o laau aina i aai o loo iai ia faatoaga tetele i Niu Sila. O se aumalaga a Lefaga ua toe foi mai faapea foi se isi aufaigaluega mai i vaega o Falealili.
Faaalia e Tuatagaloa e tusa ma le to‘a 20 nisi e lei foi mai i lenei taimi o le tausaga mo aiga i Falealili ae ua faaauau le nonofo e galulue i se faatoaga i Hamilton. O nei a‘oa‘oga na ta‘ua e Tuatagaloa ua faaopoopo i isi galuega ua faia ina ia manino lelei le tagata o loo malaga atu i Samoa nei i nisi o auala e mafai ai ona faafiafia foi i latou o loo galulue i nei galuega faigata.
“O a‘u foi na ou galue i le tauina o fua o fualaau i togalaau tetele nei ma e lē faigofie,” o se saunoaga lea a Tuatagaloa.
Ta‘ua e lea tamalii o le toatele o i latou o loo galulue i le taimi lenei i nei avanoa faavaitaimi, o loo tele foi faafitauli ua feagai ma i latou aemaise lava le tele o le vilivili atu i ai o aiga mo tupe i lea vaiaso ma lea vaiaso.
O se faiga lenei na ta‘ua e Tuatagaloa e fautuaina ai lava aiga i Samoa nei e taumafai ina ia taofiofi ona e lē o faigofie foi le taumafai mai o le au faigaluega nei i Niu Sila.
E lē gata i lea ua tele lipoti o le taumafai o nei tagata e lafo mai tupe ae foi mai e leai ma se seleni o faatali atu. Ta‘ua e Tuatagaloa e lelei tupe maua i nei galuega ae e tatau ia i latou o loo galulue i Niu Sila ona faasoasoa lelei le tupe mo i latou ina ia mafai ai ona foi mai o iai se seleni o faasaoina.
E lē gata i lea ae o loo tele isi faafitauli i le foi mai ma ua lē mafai ona toe foi i le faaauau ai o nei avanoa ona ua leai se tupe e fai ai tusi talosaga atoa ai le pasese.
O ni a‘oa‘oga o le a faatautaia i Poutasi o le a saga faamalamalama ai e lē gata i tagata o loo sauni e toe malaga i ia avanoa, a o latou aiga auala e mafai ai ona maua se tupe lelei mai i nei avanoa faigaluega aemaise o auala e mafai ai ona umi ona faaaogā seleni nei e lafo mai e i latou o loo galulue i ia togalaau tetele i Niu Sila.
O Tesema lea e tatau ona toe foi ai nisi o aumalaga o lea polokalame mo Niu Sila.
