O le taumafaiga a le tama matua ia Leilua Peaalii Tevaga Kose ua 84 tausaga o le matua o lona soifua, ua ia tuufaatasia ai se polokalame i totonu o le DVD ua faaigoaina o le “Fagufagu a le matua moe po” o le uiga o lea faaupuga ua faaulutalaina ai lenei taumafaiga e faapea, o le uiga o le upu fagufagu, o le matua alofa e putiputi i fanau ina ia manuia lo latou soifua i le tino ma ia manuia lo latou atinae mo le latou lumanai aua aoaoga.

O le auga o aute ma le fu’a taualauga o lenei faamoemoe o le toe momoli mai lea o se tuualalo ma se feau i alo ma tama fanau o Samoa o lo soifua a’e i atunuu i fafo, ina ia aua nei faagalo afia i lona vao pe faagalo tae o ia atua i le tatou tofi mai le Atua e ala i le aganuu ma le agaifanua o le tatou faasinomaga lea o lo o iloa ai tatou e le lalolagi, aua e iloa oe o le Samoa i lau tu, o lau savali o lau nofo ma lau tautala i lau gagana faaaloalo.

O le mafuaaga foi lea o le nonofo i atunuu o palalagi ae le mafai ona faagalo Samoa i lana masani, aua o Samoa o le atunuu ua uma ona tofi e leai ni faiga faasoloatoa e pei o isi atunuu o le lalolagi. E iai lona faavae e tausi ai le va fealoai ma ona tagata, e iai le filemu fealofani ma felagolagomai.

Ua mafua ona a’e se finagalo o le tama i lea taumafaiga, ona ua silasila atu sulu o le tino i le faaga’e mai o le tai i le tele o suiga fou ma mea ua tulai mai i le lalolagi ma ua faigofie ona tosina ma avaga iai finagalo o alo ma fanau o le atunuu ae galo ai lo tatou tofi.

Ootiina o le lipine i le tatala aloaina o le dvd

Ootiina o le lipine i le tatala aloaina o le dvd

O le agaga moni ma le faamoemoe o le afioga ia Leilua Peaalii Tevaga Kose afai e tuuvale fanau i le latou taimi o lona uiga o le a afaina tupulaga o loo mulimuli mai. O le upu faasamoa e sua le ava ae toto lona ata, o le ā le finagalo o le Atua iai latou matutua ae tulai mai fanau e tauave le galuega, ia tumau pea Samoa i lona pale ta te tiu ai i le lalolagi.

O le meaalofa a le Atua ua tuuina i le afioga ia Leilua e ala i le aganuu a Samoa, e ala i le taumafaiga o lenei DVD, sa tagi lava i le Atua e fesaosoani mai i le tapenaina o lona mafaufau aua le faufauina o vaega taitasi o loo faailoa i totonu o lenei lipine. E tele ni masina sa tapena ai le tama i nei vaega taitasi ae tasi lava le masina na pueina ai. E tele ni vaega taua o loo tuufaatasia i totonu o lenei lipine e pei ona iai lona vaega muamua, o le mafuaaga o upu ma lona faaaogaina i le gagana faafailauga, o upu faaalagaupu a le atunuu o loo faatinoina ai galuega a tulatoa ma faleupolu aua tausiga o aiga. O nisi o vaega taua o loo faamanino ai vaega e uiga i le ava i le eseesega o upu o ava i le fale ma upu o ava i fafo, o loo iai foi tofiga o le atunuu aemaise o vaega o folasaga e amata ai lauga poo fetalaiga a tulafale ma le tele lava o isi vaega o lea ua mafai ona tuufaatasia i lenei faamoemoe.

O le molimau a Leilua Peaalii, e lei lelei ni ana aoaoga sa iai, sa gata lava ia i aoaoga a Fesoasoani ma aoga a Taupousa, sa fiu ona matua e tulei ia i le aoga aua sona lumanai manuia ae paga lea ua suamalie ia te ia le tautua i lona tama ma lona aiga ma lona nuu. Ma o i tonu lava o loo talitonu ai le tama o loo ala mai ai faamanuiaga nei a le Atua i lona soifua, aua o le ala i le pule o le tautua.

Saunoaga a le afioga Patele Iosefo Timu i le tatalaina o le DVD

Saunoaga a le afioga Patele Iosefo Timu i le tatalaina o le DVD

I le taimi o lona taulealea, sa ia vaai ai, e uma loa se taumafataga a le nuu ona tulei mai lea i tua o le laulau ma faapea mai toeaiina, ia outou manuia, ma e maua lava e lana faalogo nei faamanuiaga ona ia talitonu lea o le taimi lava e mamulu mai ai le upu o le taimi foi lea e apo ai le faamanuiaga a le Atua.

E pei foi o foafoaga a le Atua i le tagata, na uma loa ona faia e le Atua o le tagata ona manava loa lea o le Atua i le manava o faamanuiaga, lea lava la ua tuu faasolo mai e pei ona iai Samoa ma lona atunuu. O Samoa lava latou ua tofia e le Atua e pulea e matai, o matai e tausisi lava i poloaiga a le Atua.

O lona olaga atoa sa tautua ai i le aiga o lona tama i Leulumoega i lona olaga taulealea, a’o suafa ai lona tamā i le suafa Pilia’e, sa ia maua a’e le tama e suafa ia Amiatu Tauaneai, o ia lea sa ave iai le faaaloalo a Leulumoega a’o avea ai ma tuua o le nuu. Ina ua matua le soifua o Amiatu ona see atu lea o le faaaloalo a le nuu i lona tama ia Pilia’e e fai ma tuua o le nuu. O se mea faigata le ola tautua, e le tatau ona faaletonu se mea a le matai i mea faalelotu ma mea faalenuu. E tiga lava le mativa e saili lava i le sami e saili i le vao ona o le agaga moni lea o le tautua ia aua ne’i ta’uvalea le matai. Aluai aluai lana tautua ona tofia lea o ia e lona tama e alu i Savaii e tautua lona matai i Savaii, sa tulai lava ma alu e faatino le galuega e pei ona tautua ai. Poo fea lava e potopoto ai le nuu e auauna lava ma le faamaoni. O le faamaoni e ala mai ai faamanuiaga a le Atua.

O le agaga maualuga o le tama na pueina ai le DVD ina ia mafai ona faalogologo ma vaavaai tagata a’o talanoa tuu sao mai i le momoliina mai o upu a le atunuu ma lana aganuu. Aua e taua le faalogologo ma vaai, ua le gata i fanau lalovaoa a Samoa, a’o tagata matutua foi o loo fia maua lea faamanuiaga mai ia Leilua Peaalii Pilia’e Tevaga Kose. O aso anamua e lei tusitusia ini pepa upu na talanoa mai ai matua, ae sa tuu gutu ma tuu taliga upu ma faamanuiga lea ua sapi ai matua matutua i le taimi nei.

O le afiafi o le aso faraile ua mavae 19 o Oketopa na aloia ai le tatalaina o lenei faamoemoe i le hall i Malaeola, ma o lea sa tumutumu ai le mamalu o le atunuu aemaise o ekalesia eseese sa tilitili alu atu, e fia molimauina le uluai taumafaiga a lea tama. O le upu moni e toatele i latou o loo galala i le aganuu a Samoa ae o le agaga faafetai iai latou ona ua mafai ona maua lea faamama avega mo i latou aua le nofo malamalama i upu o Samoa aemaise o lana aganuu.

Saunoaga a le afioga ai Patele Iosefo Timu i le tatalaina o le dvd

Saunoaga a le afioga ai Patele Iosefo Timu i le tatalaina o le dvd

Na maualuga le faamoemoe o lea po aua e toatele susuga i faafeagaiga ma o latou faletua sa auai aemaise o afioga i Patele o le Ekalesia Katoliko i Aukilani, sa auai foi tamaitai sa o le Little Sisters of the Poor o sui o Mapufagalele, sa latou ootiina le lipine aemaise ai o le tauaaooina atu iai o le meaalofa a le tama aua Mapuifagalele.

O le afioga ia Patele Iosefo Timu na taitaiina le sauniga a’o le tofa ia Asiava Tuipea sa fai ma fofoga o le po. O le saunoaga faapitoa o le afiafi na saunoa iai le konesula o le malo o Samoa ia Faolotoi Reupena Pogi, a’o le afioga ia Taupau Petelo Mulipola sa fofogaina le soifua tautua atoa o le afioga ia Leilua Peaalii mai lona laititi seia oo i lona matua i totonu o lona aiga i Samoa ma Niu Sila nei.

O upu mulimuli o le po na sanunoa ai le afioga ia Leilua e momoli le agaga faafetai i le Atua ona o lenei faamoemoe ua faataunuuina ma le manuia faatasi ai ma lana faafetai i le paia o Samoa potopoto sa auai atu ae faapea foi i le aufaigaluega paia a le Atua sa mafai ona molimuina lona faamoemoe.

E lua DVD o loo mafai ona maimoa iai le atunuu i le umi e fa itula, a’o le nofoaga i Ausetalia ia Sofia Patolo o loo faatauina ai lenei lipine e maua i le telefoni 0413716670, a’o Mareta Lealofi o loo faatauaina ai le lipine i Ueligitone ma nisi vaega o lalo e maua i le telefoni 02041652884, ma Aukilani o loo maua ia Selemena Leilua 02108354073 poo le emeli thelaunch2018@outlook.com.