Faavae se mafutaga Samoa fou i le itumalo o Ipswich

O se mafutaga fou ua  faavaeina nei i le itumalo o Ipswich, ma ua faaigoaina o le ‘Foafoa Ipswich Samoan Community’ Inc (FISC).
Ma o le Aso Tofi aso 4 o Iulai na usuia ai le uluai fono a le Komiti mo lea mafutaga fou.
Ua mae‘a nei ona teuteuina aloaia ona tulafono faavae ma ua sauni  mo le resitalaina i le Fair Trading.
Ua lua nei vaiaso talu ona faamaopoopoina lenei mafutaga ma o le taimi nei ua iai ona sui resitala ua faavaeina ai le mafutaga.
Ua filifilia foi le laulauafono: Peresetene – Taupa‘u Ulalei Mano Tootoo Opapo; Teutupe – Moefaauo Toetu Milo; Failautusi – Tofilau Faraimo Apelu; Sui Failautusi – Roseta Tauiliili Pepe Patū.
O Faamoemoega (objectives) poo sini tauave o lenei mafutaga:
1.     Ia faia se sisigafu‘a i totonu lava o Ipswich ma Nuu tau lata ane.
2. Faia ni gaoioiga mo i latou e lē atoatoa le malosi i le tino ma le mafaufau
3. Faatāuaina o tulafono a le malo, e pei o le puipuiga o le saogalemu ma le ola fiafia o tagata uma, aemaise lava le puipuia mai o alo ma fanau mai soligatulafono e iu atu ai i le toese.
4.     A‘oa‘oina o alo ma fanau i tu ma aganuu e lē o mafai ona latou   mauaina i faleaoga i nei atunuu
5.     Faatāuaina o tuaa matutua.