Faavae le mafutaga a faifeau i Melepone e faaola le autalavou

O le amataga o le tausaga nei na faaoo ane ai se faatalosaga mai le matagaluega o leoleo i le pitonuu o Sunshine i le aai o Melepone, i nisi o le aufaigaluega totofi a le Atua, mo se fesoasoani mo tupulaga talavou ua faatuputupulaia le faatupu faalavelave ma le faamisa i train station e pei ona sa faalauiloa i le auaunaga a le Samoa Times i nai masina ua mavae atu.
O le itu matagofie ua tulai mai i le mae‘a ai o talanoaga e lua a faafeagaiga, ua amataina ai nei se mafutaga a faifeau mai Ekalesia eseese e fia o le tovine a le Atua o loo faaopea ma faafale lē malu i tulimanu e fia o le aai tele.
O se finagalo faaalia o le mamalu i le mafutaga, ua silasila ma le toto‘a i le faafitauli e pei ona aliali mai, ma ua mautinoa, e lē mafai ona fofoina i se taimi puupuu, e manaomia ni fuafuaga ma ni aiaiga mo se taimi umi, ona faatoa amata lea ona vaaia ma tau aliali mai se tali.
O le Aso Gafua na tuanai atu, na faataunuu ai le mafutaga lona tolu a faifeau, lea na faatino ai tiute fai o le laulau e pei ona totofi mai i le mafutaga ia Fepuari, lea ua taitaifono ai le susuga ia Penaia Te‘o o le Ekalesia Uniting Church, sui taitaifono le susuga i le toeaina Aviti Etuale o le EFKS, ma le aao tusitusi ua faatautaia e se tamalii o loo galue mo tupulaga talavou (youth worker ) le susuga ia Graig.
I mafutaga e lua ua mae‘a, ua maitauina ai le toatele o le aufaigaluega mai Ekalesia eseese ua auai atu ma faamaopoopo le mafutaga, aemaise o le talisapaia o le mataupu e uiga i tupulaga talavou e pei ona tauave nei o la latou mataupu autu.
E talitonu le faamoemoe, ua vavala ata o ta‘ulelei mo le tupulaga, auā o lea ua finagalo autasi auauna a le Atua, e tu‘itu‘i puipui o le lagi mo se faasinomaga, e lē masalosalo foi, o le amataga lenei o le galulue soosoo tau‘au o Ekalesia uma, ae faataatia ese le silasila pitotasi o le faifeau lava ia na o ia ma lana Ekalesia.
Viia ai le suafa manumalo o Iesu Keriso.