Ua fai sina leva o nai tausaga talu ona fofoa mai le Aoga Sa lālā i le aai o Ipswich lea na faavaeina i le Sapati Aso 7 lea o Iulai. O se vaega o nei aiga na fofoa mai i le Ekalesia a Logan City i lalo o le taitaiga a le Susuga ia Pr Ieti Ah Sue seia oo mai i le tausaga e 2009.
Talu ai ona o le maomao o tulaga ma nofoaga e aumau ai nei aiga na mafua ai ona faatuina lenei Aoga Sa lālā e pei ona amataina e le susuga i le Toeaina ia Ilimatogafau Aukuso Limu ma le faletua ia Araisa ma se vaega o aiga. E faamanuiaina lenei foi Ekalesia ona o loo iai nisi o nai mātua matutua ma le toatele o le autalavou faapea alo ma fanau ae tainane le loaloa o le Ekalesia.
Na tele le saito e fia seleseleina ae ua toaitiiti le aufaigaluega ma faapea ona faaopoopo mai le susuga i le faafeagaiga ia Tusitina ma le faletua ia Lata Faiumu ma tausia loa lenei Ekalesia a North Central faapea le Aoga Sa lālā i Ipswich.
Ua tupu ma ola talaulau le galuega ma ua atoa matafale i le taimi e tusa ma le 14, ua tatau lava ma onomea ona avea ma Ekalesia faavaeina. Na taitaia le sauniga paia e tatalaina ai le Ekalesia e le Peresetene ia Gorge Munoz o le Sth Qld Conference a le SDA ma le failautusi ia Malcom Potts.
Na faafofoga manino le auvalaaulia i se ripoti o le amataga o le Ekalesia ma ona taualumaga aemaise o le Aao faivavega o le Atua na ia taitai mai ai, lenei ua tau ai lau o le faamoemoe i le manuia.
O le Ekalesia a Ipswich ua atoa i ai le 10 o Ekalesia o le Matagaluega Aso Fitu o le Toe afio mai i Kuiniselani (SDA Conference South QLD). Na felanulanuai le taumafataga, na faamalieina ai le aofia ina ua mae‘a foi le upu folafola.
Sa fai ma fofoga o le aso le Susuga i le toeaina ia Faatoafe Nofo Fanene e faafeiloaia malo faaaloalogia ma faatautaia le aso.
O le susuga i le faafeagaiga o le Ekalesia a Ipswich o Tusitina ma le faletua ia Lata Faiumu.
Taitai toeaina o le Ekalesia o le susuga i le toeaina ia Tuuu Ierome, ma le Fesoasoani Taitai toeaina o le susuga ia Ilimatogafau Aukuso Limu.
