O le faamamafaina o le tautua ma aiā tatau o sui faasalalau ma Tusitala mai Sini Ausetalia na mafua ai ona tuufaatasia lenei Asosi Fou.
O le Sydney Samoa Media Association o loo auai ai nisi o tautua eseese i luga o Leitio ma nusipepa Samoa o loo faamautu i Sini.
E fa vaiaso o faasalalau le uluai fonotaga i le masina o Me faapea le Fonotaga lona lua ia Iuni 2012. O le Aso Toonai talu ai na faavae ai loa ma saili tofiga o le Laulau Fou.
O le Afioga Leaupepe Matautu le Faufautua ua loa foi na galue faamasino i Tiafau i le Faamasinoga o Fanua ma Suafa. I taaloga o ia na siamupini i le Pine Auro i faipelega a Samoa i taaloga a le Pasefika na faia i Papua i le 1968.
O lea autaaalo e toafā na aofia ai ma suafa iloga ia Seiuli Paul Wallwork i le siisii, ma Dawn Rasmussen i afeleti faapea Gaopo‘a Maitua i le malafoni. Sa avea Leaupepe ma siamupini o faipelega a Niu Sila i le 1970 a o lei malolo litaea.
O le Afioga Galumalemana Fata Pati Masini mai Sapapalii ma le Aai o Niue ua filifilia i le tofi Peresetene. O le tausaga e 1996 na amata faasalalau ai Masini i alaleo Leitio i Sini nei ma o loo tautua pea i lana polokalame o le Laumua o le Talalelei FM99.9 i Aso Sa taitasi mai le itula e fā i le vaveao o Aso Sa seia paia le itula e ono i le taeao lava.
O le susuga a Tofa Faaitenuu Semikueva Lynch ua loa foi i le taleni o le fai faaili ma o loo tautua mai i le alaleo o le FM98.5 taeao o Aso Sa mai le itula e ono agai atu i le valu i Aso Sa. O loo galulue faatasi i latou ma sui faasalalau ia Farani Swann, Opi Toomalatai ma Tupuola Faavae Eli.
O le Failautusi ua tofia i ai le Afioga Leilua Jerry Uesele o loo tautua mai nei i le polokalame a le Samoa Sportstar i le FM89.3 i aoauli o Aso Lua mai le lua seia paia le fā i le afiafi.
O le Teutupe ua tofia i ai le susuga ia Farani Swann o loo galue i le Fofoga Moomia FM 2000, ma o se sui foi o le vasega o Tuaa sinasina a le Mafutaga i Sini nei.
I mataupu tau fesootai ma le malo ma matagaluega eseese ma le va i fafo (Public Officer) ua filifilia ai nei le tamaitai ia Ivona Laufili Tuaimau.
O le tamaitai ia Ivona o se tusitala tutoatasi ma o loo fesoasoani tele i le mamalu lautele i fesootaiga ma matagaluega e pei o Ofisa malaga, falemai ma aoaoga.
Ua toatele foi ni sui na faaoo atu faanoi ae peitai ua lē avanoa i lenei Fonotaga tāua. Sa talanoaina ai i le sailiga Tofi auala e faaleleia atili ai le tautua tuufaatasi a sui Sini nei, faaopoopo i ai ma le sailia o ni aoaoga aemaise o le faaaogāina o taleni tusitusi i sa latou lomiga laiitiiti i masina taitasi.
E lē gata i lea ua fuafua foi tusitala nei e tusia ni pepa o faamatalaga e tufa atu i polokalame taitasi i Talafou a Sini e aunoa ma se totogi ma tuufaatasi se mau auā se isi laasaga fou o Alaleo Faasalalau a Samoa.
