O le tulai mai o le ekalesia Orakei Presbyterian Church, i le faaaloaiaina o sona lava faifeau tausi, e pei ona iai le faauuga o le alii faifeau, Rev Iona Levi Su‘a i le Orakei Presbyterian Church i le Aso Lulu, aso 27 o Fepuari 2013, ua lagona ai le agaga olioli ma le fia sii a‘e o le viiga ma le faafetai i le Atua a le Ekalesia, ona o lenei lava ua iu manuia taumafaiga uma ma ua atoa mai le faatulagaga atoa o le latou Ekalesia.
E lē o toe po se lilo i mafatiaga ma faafitauli sa feagai ma si nei ekalesia o loo tapuai ai le toatele o nai o tatou uso Samoa, ma nisi mai isi motu o le Pasefika, a o taumafai lava le fili e titina ifo ma taotaomia le agaga fia tapuai saoloto o nai uso Samoa i lo latou malumalu tapuai, e pei ona iai se vevesi sa tulai mai i ni tausaga talu ai, lea foi sa avatu ai se tusitusiga a le Samoa Times, i le itulau o le Tulafono.
O le sauniga mamalu o le faauuga o Rev Iona Levi Su‘a, sa taitaia e le Northern Presbytery Moderator, The Rev Fakaofo Kaio. Sa auai atu susuga i faafeagaiga ma o latou faletua, o aiga o Iona ma le faletua ia Tapuono, o uo ma ē masani faapea sui o le ekalesia, e fia molimauina ma sii a‘e faatasi le faafetai a o faauuina le auauna auā le sagai atu i le tauave o lona tofi o le leoleoina o le ola faaleagaga o le ekalesia.
O Rev Iona Levi Su‘a e mai afioaga i Samoa o Salelavalu, Iva, ma Lano i Savaii. O lona faletua ia Tapuono Toenuti Segi-Su‘a e mai afioaga o Saasa‘ai, Lano ma Safotu. E toatolu o la alo, ma le toafā o fanau a fanau (grandchildren).
O nisi o aoga sa a‘oa‘oina ai le susuga Iona, o St John’s Theological College i Aukilani, lea na maua ai lona faailoga tikeri i le “Licentiate of Theology”(L.TH). Na see atu i le Motu i Saute i Dunedin ma faaauau ai a‘oa‘oga i mataupu lava faalelotu. Sa ulu atu i le Knox College, ma maua ai le “the Diploma of Ministry” (Dip. Min). O le taimi lea e tasi o loo a‘oa‘oina foi i le iunivesite a Otago, ma ausia ai le tikeri o le “Bachelor of Theology” (B.TH).
O le ekalesia a le Orakei Presbyterian Church e tusa ma le to‘a 80 – 90 tagata lotu o loo tapuai ai mai itu eseese o le lalolagi, o Europa, Niue, Cook Islands ma Samoa.
E pei ona ta‘ua o le toe toetu atoatoa mai o le Ekalesia Samoa a Orakei, sa lei faigofie lona taumafai mai, ona o le malosi o le finau mai a le ekalesia i le itu Palagi, le Presbyterian Church a Aotearoa Niu Sila, e tapuni le falesa ma aua ne‘i toe faia ai ni sauniga lotu a le aulotu Samoa, ae ave le falesa e faaaogā e le Ekalesia papalagi i Kohimarama.
O le mafuaaga o lenei finau mai uso papa‘e e faapea, e toalaiti le aulotu Samoa, ae maimau ai le falesa e ova i le $1miliona le tau, semanu sa tatau ona faaaogā e se aulotu e toatele ma mafai ona latou totogi.
Sa finau malosi le tamaitai Loia Samoa, le faletua o Leuluaialii Olinda Woodroffe mo le puipuia o le aiā tatau a le lotu Samoa, ma na taulau manuia lena finauga ma toe manumalo ai le lotu Samoa. Sa faatusaina lea finauga e pei o le “Taua a Tavita ma Koliata”.
O le auiliiliga lenei o lea mataupu e pei ona iai i le Samoa Times, ia Setema 2010 – Tulafono:
O le Aogā o le Tulafono (Civil Law) mo Ola o Tagata i Totonu o Lotu
O le Aso Toonai, aso 11 Setema 2010, sa fai ai i le falesa o Orakei Presbyterian Church, i Aukilani se lotu faafetai a lea Ekalesia e sami ai le latou malo i le faamasinoga (apili) sa latou aveina, e tetee ai i le tapunia o le latou lotu e le Ekalesia aoao a le Presbyterian church. O le lālā a le Ekalesia aoao, lea e i Aukilani (Auckland Presbytery) lea e feagai ma le lotu i Orakei.
O le Ekalesia Presbyterian church i Orakei sa tele tagata o le Ekalesia. Sa lolotu faatasi tagata papalagi ma tagata Pasefika. O tagata Pasefika e tele i Samoa. Ua fai fai, o ese uma papalagi ae toe o tagata Pasefika. Ona taumafai loa lea o le Ekalesia aoao e tapuni le falesa ae o tagata Pasefika e sue se mea e lolotu ai.
O le faifeau palagi sa na ia vaaia le Ekalesia i le taimi na ave atu ai le faatonuga a le Ekalesia aoao o le a tapuni lenei falesa, ae o le aulotu o tagata Pasefika ia e sue se isi mea e lolotu ai.
E tele mea na ta‘ua e le Ekalesia aoao ua tatau ai ona tapuni lenei falesa i tagata Pasefika. O le mea sili ona tāua o le fai mai e leai se taiala, leai nisi e iai ni taleni e ta‘ita‘ia lenei aulotu (no leadership) ma leai ni tupe (too poor to be a congregation).
Sa tetee lenei aulotu i le tapunia faamalosi o le latou falesa. Sa ave lava e le aulotu le latou tetee i le faamasinoga muamua ma le Ekalesia aoao. E aumai le iuga e faiaina le aulotu.
Apili a le Ekalesia – Appeal
Ona apili loa lea e le aulotu le faaiuga e tapuni le latou lotu. Sa fai loa le tonu a le Ekalesia e latou te faaaogāina Woodroffe Law Partnership e faia le latou apili. O Olinda Woodroffe le loia na tu mo le Ekalesia, e fai ma a latou loia i le taimi o le apili. Sa malo ia Orakei ma ua lē tapuniina le falesa ae ua tuu mai le 12 masina e faaali atu ai ni suiga alu i luma o lenei aulotu i le Ekalesia aoao.
Ana lē faaaogāina le tulafono ma le tomai faaloia e suesue ai ma saunia ai lenei apili, e faapenei ua taupuni le falesa, ua leai se Pasefika e toe lotu ai i Orakei.
O le tele o aiga o loo lolotu ai pea, e ova i le luasefulu ma ona tupu tausaga o lolotu i lea falesa ma tautua ai. O nisi o mātua sa fananau a latou fanau i lea Ekalesia ma o lea ua o i Iunivesite a latou tamaiti. O nei mātua ma fanau nei ua o i le Iunivesite, o loo lolotu ai lava i Orakei.
E lē se apili faigofie lenei aplili. Na omai le Ekalesia aoao ma le anoano o tuuaiga o tagata Pasefika. O le tele o nei tuuaiga sa tali uma e Olinda e faaaogā ai le tulafono tusitusia a le lotu, sa faasino e Olinda i le Commission (e toafā) le tele o mea sese na faia i lenei aulotu.
E tele mea sa fesiligia ai e le loia i lea apili, ni tulafono a le lotu sa lē sa‘o ona faaaogā e faifeau o le Ekalesia aoao.
O le tulafono a le lotu, e tatau o le faifeau lea e vaaia le Ekalesia, ona ta‘ita‘i ni fonotaga faaletausaga, e talanoaina ai vaega eseese o le galuega a le aulotu. Ae sa maua e le loia i api tusitusi a le aulotu, e leai ni fono tausaga faalelotu na faia i ni tausaga se tele, na vaaia ai lenei Ekalesia e faifeau papalagi.
Na fai le faaiuga a le Commission lea e toafā, sa ta‘ita‘i ai se loia. O le faaiuga ua manumalo le aulotu Pasefika a Orakei.
Ua lē tapunia le falesa i le aulotu ae ua faaauau le lotu a lea aulotu, e toe iloilo i le 12 masina poo alu alu lelei ma tupu lenei aulotu.
Thanksgiving and Celebration:
O le Aso Toonai, aso 11 o Setema 2010, sa fai ai se lotu faafetai a lenei aulotu i Orakei. Sa ta‘ita‘ia e le Susuga a Maafala Koko se sauniga matagofie. Na uma loa le sauniga faafetai, sosoo ma le fonotaga faaletausaga a lenei Ekalesia. O se fonotaga faaletuasaga muamua lenei a lea aulotu mo ni tausaga se tele. Sa tumu le falesa i tagata Pasefika, Tonga, Samoa, Niue, papalagi.
Ona sosoo lea ma se aiga matagofie na saunia e le Ekalesia ma faafiafiaga a le Youth ma le Sunday school.
Manaia le vaai atu ua pepese fiafia mai tamaiti o le Youth ma le Sunday School a Orakei. Ua aogā le tulafono, ua toe tatala ai le avanoa i lenei aulotu. Semanu e tele le alofa ae leai se mea e mafai ai se fesoasoani i nei mātua Samoa ma a latou fanau, faapea foi ma isi atu Pasefika o loo lolotu ai.
E moni e totogi tupe i faiga o galuega faaloia a lotu, e pei o le faiga o lenei apili. O tupe a le Ekalesia e toe maua, ae lē toe maua mafutaga ma fanau i lalo o falesa na ola ai ma papatiso ai fanau a le aulotu i Orakei, pe ana tapuni le falesa e pei o le manaoga o le Presbyterian church.
Manaia le Galulue Faatasi o Samoa:
A o lei faia le apili i luma o le Commission, sa ou fautuaina le Ekalesia e fai ni latou galuega ia fai ane le apili ua iai mea e mafai ona tusi lima i ai latou, e faaali i ai o latou o se aulotu faimea mafai. Sa mafua la‘u fautuaga ona sa ta‘u mai e lenei Ekalesia, sa faatonu latou e le faifeau papalagi na vaaia le latou Ekalesia, e aua le toe faia se mea e maimau le taimi o le a tapuni le lotu.
A o gaoioi le Ekalesia ma toe faaalu i luma galuega a le youth ma isi galuega sa latou galulue ai, sa ou finau e tolo i tua le taimi o le apili. E ui ina faigata ma tele taimi na alu i lenei finauga, sa ou manumalo ma sa tolopo le apili sa tuu e fai ia Tesema 2009, i le amataga o le tausaga lenei. Sa ou talosaga e tolopo le apili ia lava le taimi e fai ai se suiga i totonu o lenei Ekalesia a o lei oo i le taimi o le Apili i luma o le Commission. O le taimi na tolopo ai le apili, sa ou taumafai foi a‘u, ia maua uma pepa tusitusia e fai ai la‘u galuega faaloia.
Sa taunuu nei mea e lua ona o le galulue lotogatasi o le loia ma le Ekalesia. Ana fai atu le fautuaga a le loia ae lē faia e le Ekalesia, e faigata tele ona tusi le lima o le loia i ni mea lelei ua mafaia e lenei Ekalesia i se taimi laititi na tuu mai e tapena ai le apili.
E ese le manaia o le galulue faatasi ma loto gatasi e sue se auala i luma o se mataupu fita ma faigata. Faafetai i le Ekalesia a Orakei i le lototoa ma le finau i mea tatau, auā le galuega a le Atua ma le ola faaleagaga.
Sa saunoa le susuga a Maafala Koko i le Aso Toonai, ua telē le suiga ua iai lenei Ekalesia i Orakei i se taimi puupuu. Manaia le lauga faamalosiau a le Susuga Maafala i le Ekalesia.
O lenei tala e faamanatu atu ai le aogā o le tulafono (Civil) e finau ai le puipui o aiā a tagata ua soliina sese e isi. E tāua foi e faamanatu atu ai, e leai se apili e te‘i ua malo e lei lava le tapenaga a le loia, ma suesue uma pepa tāua, ia aua ne‘i iai se mea e pa‘ū.
E iai le isi aogā tele o le apili a Orakei, ina ia faamanatu ai le tāua o le galulue faatasi o le loia ma le ekalesia (client). O le manuia o la‘u taumafaiga o le o lua o la‘u tapenaga faaloia ma le galulue a lenei Ekalesia i se taimi puupuu e toe liuliu ma faaalu i luma le latou Ekalesia.
