O le viiga ma le faafetai i le Atua na lagonaina i le faaiuga o le masina o Iulai, aso 29 ona ua faataunuuina ma le manuia le faamoemoe o Jim Nees ma John Kooge, ma le susuga ia Ieronimo Ponifasio, o le alo o le Susuga i le faafegaiga ia Ponifasio Ah Tani Fune (ua maliu) ma le faletua ia Gafa Telesia Ponifasio.
Sa faatumulia le malumalu o le Ekalesia Katoliko St Francis Xavier i Whangarei, i aiga uo ma ē masani i le fia molimauina o le faauuina o tamalii e toatolu i le tofiga Tiakono.
O lenei sauniga mamalu sa taitaiina e le afioga i le Epikopo o Aukilani, o Patrick Dunn ma uso Pelepitelo e toalima faapea ma alii Tiakono mai Aukilani e toasefulufā. I le mae‘a ai o le faapaiaina ma le faatautoina o alii Tiakono i o latou tofiga, sa osia ai loa le taulaga paia o le Misasa e le Epikopo, ma sa auauna ai loa ma alii Tiakono ua faauuina.
O lenei tofiga e fā ma le ‘afa tausaga na aooga ai i latou nei. E alala uma i latou nei i Whangarei ae sa aooga mai i Aukilani.
Sa faaalia e le susuga i le Tiakono ia Ieronimo le agaga maualalo ma le faafetai i le Atua ina ua faataunuuina ma le manuia lo latou taumafai ona o le fia auauna i le Atua ma lana Ekalesia.
O le tofiga lenei ua aloaia ai i latou e le Ekalesia Katoliko latou te faatinoina ai sauniga lotu, papatisoga, faaipoipoga ma maliu. Ua laiseneina foi i le malo o Niu Sila e avea ma marriage celebrant. Sa faaiuina lenei aso fiafia i se taumafataga matagofie sa saunia e le Ekalesia ma aiga. E momoli atu ai faamanuiaga ma alofaaga mo susuga i Tiakono aemaise le Susuga Ieronimo Ponifasio.
