Viia le alofa ma le agalelei o le Atua, auā o lana afio sa puipui aulape i soifua o le susuga ia Vailele ma le faletua ia Fanaua Louisa Afoa, a o alo atu i le taua o mafaufauga, le feagai ma aoaoga i atunuu mamao.
E le faigofie le ola sailiili ma suesue, aemaise lava faailoga maualuluga, ae ui lava i luitau sa feagai ma i laua i le ala, ae o lea ua a‘e ma le manumalo faiva sa o laua taupati ina ia tino mai.
O le susuga ia Vailele Afoa ua maua nei lona faailoga Doctor of Ministry – Theology mai se tasi o aoga a le Ekalesia Aso Fitu i Filipaina a o le faletua ia Fanaua Louisa Afoa ua maua nei lona faailoga Master of Arts in Education mai le aoga lava lea e tasi i Filipaina.
O le Aso Sa aso 6 o Me sa faapaiaina ai o laua faailoga i se sauniga na faia i Melepone, sa faalauiloa ai foi ma tusi na o la tusia a o iai ma galulue i Filipaina. O a la tusi ua faaigoaina o le Book of worship ma le book of identity.
Sa iloga foi le faaaogāina o o la soifua e le Ekalesia ma le Malo e le gata i Ausetalia nei ae faapea foi Korea, a o lei malaga atu i Filipaina.
O le Fofoga o le aso o le susuga ia Temese Leilua, ae na molimoli e le afioga ia Afoa Uga Afoa le faafetai a le aiga Alii mo le Ekalesia ma le valaaulia, ona tali fuaitau lea o Leaufaamulia Siliato e fai ma fofoga o Samoa.
Ua maoa‘e foi le tomai ma faailoga ua faamanuiaina ai soifua o nei tamaalii o le Ekalesia Aso Fitu, ae mitamita fai a‘e le agaga ona o i laua o ni tamafanau sailimalo a Samoa. Malo le tau, malo le toa!
