Wishing you all the best from your families and friends in New Zealand, Samoa, Australia, and USA, especially your Supervisor, Dr Philip Culberton in USA.
A o e feagai ma aoga, sa nofo tatalo ma tu‘i atu lava le muli papaga e le Susuga i le faafeagaiga ia Tavita Taulealo ma le faletua ia Tumanu, le tamā ia Tipa Maliko ma le tina ia Latatuli, faapea le Tofa ia Malolo Alapati ma le tina ia Sofaea ma aiga na lua; tainane le tapuaiga a Aiga ma Salafai (Asau) faapea Safune ma Taulauniu (Vaisala).
O lenei ua iu manuia lou taumafai. Malo le tauivi, malo le onosai ma finafinau. Malo faaea aiga, faaea nuu ma Ekalesia.
Lo‘u agaga e, ia e faamanū atu ia Ieova. O mea uma foi o i totonu ia te au, ia faamanū atu i lona suafa Paia. A o la foi a le faisalamo, o le faamoemoe ua taunuu, o le laau lea o le soifua.
Auā o faiva sa tapuaia lea ua a‘e manuia, auā lau lupe faalele sa fofoa mai i le malaefono i Mati‘a ma Mati‘aitu‘au, auā Aiga ma Salafai, lea ua faalele nei auā le Atua ma lana Talalelei. Ua lē gata i Aotearoa a o Samoa e ala i le laumua i Malua auā le aoaoina o tamafanau a le Ekalesia EFKS i Malua.
O la Saulo ia Tavita, e te faia lava e oe mea sili ma e manumalo ai lava. Ia manuia le toe foi atu i Samoa i le Laumua i Malua. A u mai lua tua ae totō pea manū ma maua le lua malosi, o loimata na ma tapuaiga a o oulua mātua ma aiga.
O le tatalo foi lena a le Susuga i le toeaina ma le faletua i Papakura, a o se faanōnō manū foi lena a le lua faafeagaiga, le Susuga ia Silo‘a Lologa ma le faletua ia Lotofoa ma le Ekalesia EFKS i Weymouth.
Ia faamanuia le Atua ia te oulua ma le nofoaalo!