Faauuga o le Susuga Faleu Joe Tausa Futi

“Lou agaga e, ia e faamanu atu ia Ieova, o mea uma foi oi totonu ia te au ia faamanu i lona suafa paia.” O upu ia a le faipese o Tavita na uluai saunoa i ai le susuga ia Faleu i lona agaga faafetai i le Atua i totonu o le Valentines Restaurant. O ina na faia ai le ‘aiga fiafia ina ua faauuina i lona faailoga o le Post Graduate Diploma in Arts in Youth Development i le Auckilani i le masina lenei o Aukuso.
Sa saunia e le susuga ia Iosia Faleupolu le sauniga lotu a o faafofoga aiga ma uo aemaise foi o le faletua ia Talapauna ma o la alo a o saunoa le susuga i le tausi matagaluega i ni saunoaga matagofie mai le afioga paia a le Atua.
“O le faamoemoe ua taunuu o le laau o le ola lea”. E lei faigofie lenei faamoemoe, ae na saunoa le susuga ia Faleu e moni lava e leai se mea e faigata i le Atua. O Faleu Joe Tausa Futi o se alo faasino i le afioga Tausa Talifaaifo Onosai Futi mai Manono ma Fasitootai, ma lona Tina o le afioga ia Tausa Tuluvao Futi mai le afioaga o Safotu.
O lenei aso sa faatumulia i uo aiga ma ē masani. Sa maitauina i lea aso le sagisagi fiafia ma le agaga faafetai o mātua ma aiga o uo ma ē masani o ē sa auai i lea faamoemoe.
Sa faaalia foi le agaga faafetai tele a Faleu i le tapuaiga ma le tatalo a le susuga i le alii Sea aemaise o le Ekalesia Metotisi Samoa i Otara ma i latou uma o ē sa tapuaia lenei faamoemoe.