O le Aso Tofi, 18 o Aukuso na faatumulia ai le Kolisi a Leoleo i Porirua ina ua a‘e manuia le faatautaiga a i latou na a‘oa‘oina i lea tofiga tāua.
O se tasi o alo o le atunuu le susuga ia Constable Taylor Tutuila na faauuina ai foi i lea vaega, ma o se tulaga mitamita lea o mātua, afioaga, ekalesia, aemaise le atunuu pele o Samoa, i le laalaa pea i luma o o tatou tagata i soo se tofiga lelei.
O ia o se tasi o alii talavou o le Autalavou Laiti (Junior Youth) a le EFKS Petone i le Ekalesia o loo faifeau ai nei ona mātua, Fereti & Sosefina Tutuila.
O Taylor na fanau i Niu Sila. O lona tina e mai le nuu o Leufisa, ma lona tamā e mai Tanugamanono. O Taylor na amata aoga mai i Malifa i Samoa.
Na faaauau lana aoga i le Primary School & High School i Zambia i Aferika ina ua 10 ona tausaga i taimi o faamisionare ona mātua i Zambia. Sa aoga ai o ia i le Italian School of Lusaka & Pinewood School i Lusaka.
Na toe taliu mai i Niu Sila ma faaauau lana aoga i St. Pauls College i Aukilani,
seia taunuu mai ina ua ulufale i le New Zealand Police College, ma tini ai loa lona taumafai.
Faamalo tau, faamalo le saili malo. Ia tele pea se viiga o le Atua ina ua tau lau o lona faamoemoe.
E momoli atu le faamalo ma le faafetai i le atalii ona o le taumafai, faatasi ai ma moomooga alofa mai le EFKS Petone ma ou aiga uma.
Ia manuia le agai atu i le galuega ma ia faamanuia ma faamoemoe pea i le Atua.
Alofaaga mai ou mātua: Rev. Fereti & Sosefina Tutuila; o ou grandparents: Faumuina Tutuila Fereti & Faaluaumeke; Tuumatavai Tavita & Mine; ma ou tuafāfine: Faalua, Mine, Anna & Zambia.
E momoli atu foi faamanuiaga a le Sooatulau ma le Samoa Times i lau susuga i le Malu o le malo, Constable Taylor Tutuila mo lenei faaeaea ua e faatino mo mātua, aiga ekalesia aemaise le atunuu.
