O le Faamoemoe o le Atua mo le Tagata
Ua faaiuina nei le taua o le mafaufau ina ua faapaleina i latou i le tomai ma le tamaoaiga na a‘oa‘oina ai e ala i mataupu sa tauiviina ma suesueina i le tolu tausaga i totonu o le Kolisi Faa-Faifeau a le New Assembly of God i Aotearoa.
O le afiafi la o le Aso Sa, 25 o Novema, o le aso o le seleselega, e pei ona tapenaina le faamoemoe e le susuga i le alii pule o le Kolisi, Susuga Setu Visesio ma le vasega o faiaoga ma le komiti faafoe, ma na matagofie foi lona faatanuuina. E toasefululua le vasega na tatau ona faauuina, peitai e toasefulu na mafai ona faatinoina lea faamoemoe.
E toaiva na faamanuiaina i tusipasi o le Diploma, e aofia ai le susuga ia Alesana ma lona faletua ia Akenese Manuleleua, Cypress Asomaliu Tuli, Tofi Tuli, Faamalele Maliko, Landi Fono Ki, Talaleomalie Talimai Iose, Laufau Amosa ma Saneli Sione Amosa.
E toalua na faamanuiaina i le faailoga o le Bachelor of Arts Degrees in Ministry, o Kuini Ki ma le susuga i le Peresitene o le komiti a le Kolisi, Susuga Fono Ki.
O le Susuga Rev Dr Leo Vea sa na laugaina le upu a le Atua ma ave foi le faamanuia ma le faamalosi ia i latou na faaautu i ai le aso.
Sa saunoa foi le afioga i le Peresitene o le sui o le komiti e faaopoopo i le faamanuiaga ma le faalaeiau a le ta‘ita‘i.
O le Susuga Taliu na feagai ma talosaga a o le alii pule lava o le kolisi, Susuga Setu Visesio sa fai ma fofoga (MC) o le polokalame o le aso.
Sa maitauina le loimata maligi o le fiafia ma le loto faafetai auā e lei faigofie le tauiviina o mataupu sa feagai ai.
O nisi sa tauau ina goto le faamoemoe ma tau faavaivai ona o le fetuani mai o nisi lavasiga, aemaise foi o le tau faapaleniina o taimi mo isi tiute ma tofi i nisi vaega o le soifua tautua e le gata i totonu o aiga, ae faapea foi i totonu o aulotu o loo galulue ai nei auauna.
I lea la afiafi na lagona ai foi le leo, ‘se mea ina a manaia o le faamalosi ma le faamaoni e ala i le fesoasoani mai o le Agaga o le Atua ma le talitonuga, e mafaia mea uma i le faalagolago ma le faatuatua i le Atua’.
Lea la ua ‘ae‘ae ai nei i faleseu ma saa i maa o malie i latou nei, ina ua tali faaaliali mai le Atua ia latou taumafaiga.
Ia faamalo le tau, faamalo le lototele ma le onosai. Viia le Atua ina ua a‘e malo faiva ua tuu taula sa i fanua, ae laualuga ai le finagalo o Iesu Keriso ma faapea ane, o maia ina o atu ia fai nuu uma lava ma soo.
