O aso tāua nei i soo se matua, o aiga faapea foi ma fanau, a o agai atu e maimoa ma molimauina le taimi o le a amanaia aloaia ai ni galuega fita sa feagai ma alo ma fanau, o uo, a o ni mātua foi, mai a‘oa‘oga sa punouai ai i le tele o aso, auā ni tomai faaopoopo e fesoasoani i le sailia o galuega mo le sini lava, ia tausia lelei aiga ma fanau.
E latalata i le 500 i latou na faauuina mai nisi o faailoga i mataupu eseese sa a‘oa‘oina ai le polokalame faaauau pea BEST Pacific Institute of Education.
O le vaega o loo a‘oa‘oina ai mo le tusipasi a le NZQA i le Level Three ma faasolo atu ai i le tipiloma i le Level Five, sa faauuina ai i lena sauniga mamalu.
O le Hall a le Auckland Girls Grammar i Ponsonby sa faia ai lenei faauuga, ma na matagofie le vaaia o le tumutumu atu o tagata Pasefika o tauaiga o le aufaauu, aemaise foi se iai le toatele o isi faauluuluga o matagaluega, o le au faipolokiki ma le mamalu eseese o le atunuu.
Ona o le toatele o lenei faauuga, na vaelua ai i ni faauuga se lua.
O le faauuga muamua na faia i le itula e 2pm i le aoauli, lea na avea ai le tamaitai Minisita o le Matagaluega o Tagata Atumotu o le Pasefika, Honourable Georgina Te Heuheu, ma failauga autū.
O le faauuga mulimuli na faataunuu i le itula e 6:30 i le afiafi, ma sa valaaulia ai le alii faipule o Magele, le Afioga Su‘a William Sio e avea ma failauga autū o lena faauuga.
E tele mataupu ma tomai eseese na faauu mai ai i latou i nei polokalame a le BEST e amata mai lava i mataupu tau Pisinisi, Komepiuta, Freight, IT Support, Retail ma Turisi ma tomai i galuega tau Faamalagaiga (Travel).
O nisi e ui na faauu mai na tusipasi, ae o loo iai le faamoemoe e fia faaauau pea i nisi atu tusipasi maualuluga ae o nisi foi ua agai atu nei e sailia ni galuega i nei tomai na a‘oa‘oina ai.
Na faamatalaina e le tamaitai faatonu o le BEST, Anita Finnigan le faauuga i le vaiaso talu ai o se tasi o sauniga iloga i le talafaasolopito o le BEST, ona o le matatia ua mafai ona ausia o le 425 o le aofai o i latou ua mafai ona faauuina i le Level Three poo isi vaega i luga atu, lona uiga o se matatia tele lea e faamaonia ai le agaigai i luma o polokalame tau a‘oa‘oga a le BEST.
Saunoa Ms Finnigan, “o le faauuga a le BEST ia Iulai, o se faaataga lea o le naunau o fanau a le Pasefika i nisi o polokalame fou a le Malo i tulaga tau a‘oa‘oga – ia ausia e nei fanau ma faateleina o latou tomai i tulaga maualuluga (higher level).
E tele polokalame a le Malo o loo faataatitia mo le a‘otauina o fanau a le Pasefika i nei tomai e mafai ai ona latou ausia ma maua ni galuega e lelei totogi, ma o le tulai mai o lenei matatia tele i le faauuga a le BEST i le vaiaso talu ai, o se faailoga o loo iai moni se mea faapena o loo tupu i nei polokalame.”
