O ē lūlū ma loimata, latou te selesele ma le alaga fiafia
O lagona fiafia ia ma le agaga ua tumu i le faafetai i le Atua ona ua iu ma le manuia taumafaiga a le 31 o tama ma teine o le Kolisi o le Tusi Paia a le Pasefika i Ueligitone.
E muamua la ona tatou sii le viiga ma le faafetai i lo tatou Tamā i le lagi, auā o lea ua talia le faautugatagi, ua to‘a le mata matagi, ae ua pepese fiafia ai nei fetu o le lagi. Ina ua a‘e ma le manuia i fanua le “faatama-soa-alii” a tama ma teine a o tatou o le fanau a le Atua.
Ua moni ma faamaoni upu a le aposetolo o Paulo i le 2 Timoteo 2:12. Pe afai tatou te onosai, e fai foi i tatou ma tupu faatasi ma ia, pe afai tatou te faafiti ia te ia, e faafiti foi o ia ia te i tatou.
E momoli le agaga faafetai i le tamaitai pule, Eseta Ioane Roach, le susuga i le taitaifono Rev. Pelema Leasi, ma le mamalu o faiaoga ma le komiti faafoe a le kolisi. Faamalo galulue faafetai ua iu manuia taumafaiga o lenei tausaga.
Ma ua faatuina foi le asosi a tama ma teine tuai e fesoasoani ai i galuegafai a le kolisi.
Faamanuia tele le Atua, faamanuia atu le Kirisimasi ma le tausaga fou.
