Na suia uma lagona o le vaivai ma le tiga ina ua oo i lona taunuuga ma le sini autū sa faamemelo i ai ma naunau ina ia taunuu i sona iuga lelei. Ona moni ai lea o le upu a le Tusi, “E lē puupuu le aao o le Atua i lana fanau”. O le lagona faafetai, na vaaia ai loimata o le fiafia ina ua faamanuiaina le taumafai sa tauasa mai ai i le tele o tausaga.
O le vaaiga lea sa iai le Aso Faraile na tea nei i se taumafataga tele i le maota o le Assembly of God (Faapotopotoga a le Atua) i Magele a le kolisi o le Ia Malamalama Agape Bible College i Aukilani, e fiafia ai ma i latou ua faamanuiaina i nisi o faailoga faapitoa sa aotauina ai i lenei tausaga.
O lenei faamoemoe sa fuafuaina lea e le pule aoga le susuga ia Charlie Reed ma le faletua ia Rosita faapea susuga i faiaoga. O le susuga ia Peniamina William o le faaao o le aoga i Niu Sila, Samoa ma Ausetalia sa faia le upu e faafeiloai ai le mamalu o le auvalaaulia, ae o le susuga i le faafeagaiga ia Tilaulelei Kilifi sa fai ma Fofoga o le aso, ma o ia foi o se tasi o faiaoga o le aoga.
E silia i le fāselau le mamalu o le atunuu sa latou molimauina lenei faamoemeo e aofia ai ma susuga i faafeagaiga ma o latou faletua. O le Aso Toonai, o le aso lea sa faataunuuina ai loa le faauuga mo i latou ua faamanuiaina i lenei tausaga. O i latou e aotauina i le tausaga muamua ma le lua e maua le faailoga o le AA (Associate of Theology) pe a faaiuina le taumafai.
O le tausaga lua e toa luasefululua i latou sa faauu ai, na sili aoao ai le faletua ia Faaleo Ueli mai le ekalesia AOG mai Ranui ae o le tausaga fā e toa luasefulu i latou sa faauu ai ma maua ai le faailoga o le BA (Bachelor of Theology) lea sa tulaga muamua ai le susuga ia Peseta Vai Feliuai.
Na faaiu polokalame o le faaiuga o le vaiaso i le latou sauniga tuufaatasi sa faia i le ekalesia AOG i Papatoetoe ma fai ai ma le toonai e faauma ai galuega ma aoga o lenei tausaga.
