E eseese tomai, e eseese taleni, e lē tutusa uma foi agavaa, ae peitai o le tagata ma lana taleni, o le tagata foi ma lona faasinomaga.
O le Aso Lulu na tea nei, 27 Novema, na faatumulia ai le Waiouru Military Camp, o le nofoaga o le Army a Niu Sila, i le faauuga o alo ma fanau ua faamanuiaina i avanoa e tautua ai le Malo. O lea sauniga na faauu ai foi ma se alo o Samoa le susuga ia John Futi, 27 tausaga le matua, o se alo e faasino i le tamā ia Mika ma le faletua ia Lemoe Futi o Manurewa.
O se mitamitaga pe a oo ina faamanuiaina, aemaise o lenei matata e seāseā lava ona oo se manatu e fia ofo se taimi e aotauina ai ona o le faigata o lona faatinoga.
Pei ona silafia o le nofoaga lea i Waiouru, o i lea e faamautu i ai fitafita o le Army a Niu Sila ma koleni ai mo avanoa amata All Arms Recruit Course (AARC), seia oo ina faauu ma maua avanoa mo tiute faamiliteri i totonu o Niu Sila. O se moemitiga na momoli i talosaga a o lenei ua tino mai le faamoemoe. E lei faigofie le tauasaina ma le taimi na amata ulufale ai mo aoaoga.
Sa tele lu‘itau sa fetai‘ai peitai o le faamalosi faatasi ma le lagolagosua a nai ona mātua, e pei ona saunoa le faletua ia Lemoe, “O le upu sa ma faamamafaina e fai ma lu‘itau i le atalii, o le Salamo a Tavita, ‘E ui lava ina ou savali i le vanu o le ata o le oti, ou te lē fefe lava i se mea leaga auā o oe ta te faatasi ma a‘u o lau laau ma lau tootoo e faamafanafanaina ai a‘u’. Sa lagona lava lo ma faagaeetia ma le mafanafana auā sa ave lava i le Atua le fanau ina ia mafai ona faaaogā o latou ola e tautua ai tagata lautele ae ia tele ai sona viiga.”
O se sauniga na faatumulia i le mamalu o mātua, aiga ma uo a le au faauu. E lē gata ina faauu le alii o John mai le Army a Niu Sila, peitai na avea foi ma aso fiafia na faia ai le la faamau ma lana uo le tamaitai o Ashley McGregor o Waiouru lava, a o molimauina e o la aiga ma uo.
Ua a‘e ma le malo le faatautaiga sa alo faiva i ai le atalii, o lea ua pale i manuia, e toe faafoi ai le viiga i le Atua.
