“Ia i le Atua poto pea lona viiga i aso uma mai i le vavau e oo i le faavavau. O le faamoemoe foi ua taunuu o le laau o le ola lea.”
O lagona na o le Aso Sa ua mavae ina ua faataunuuina ma le manuia le faamoemoe o le faauuga o nisi o Failauga poo toa o le Talalelei.
O foliga vaaia na o le matagofie o le Atua sa faatumulia ai finagalo ma loto o aiga, uo ma ē masani, aemaise ai o le paia i le auvalaaulia sa molimauina lea sauniga tāua ma le mamalu i le mae‘a ai o a laua aoaoga.
O le faamoemoe maualuga ina ia toatele nisi e lagolagosua i le galuega a le Atua, ona ua tupu le galuega e pei ona fetalai Iesu i lona ausoo, ‘e tele le saito e seleseleina ae o le aufaigaluega e toaitiiti ia’. Mataio 9:37.
Sa faataunuuina lava le sauniga i le malumalu o le Ekalesia Showers of Blessings Samoan Christian Church i East Tamaki, i lalo o le taitaiga a le susuga i le Faafeagaiga, Rev Elder Fineaso Faavae ma le faletua ia Tausaga Faavae.
O se sauniga sa matuā faatumulia i aiga ma uo o i latou sa faauuina aemaise o le auvalaaulia, ma na lagona ai foi le mamalu o le Atua mai lava i le amataga seia oo ina faaiuina.
Ua moni ai le Afioga Paia a le Atua, ‘Afai e au i tatou ma le Atua, o ai ea se faasagatau mai’? Mataio 16:18. Ou te ati a‘e foi la‘u Ekalesia i luga o lenei papa e lē mafai e faitotoa o Seoli ona manumalo ai.
O i laua sa faauuina o le susuga ia Aukuso Iosua ma le faletua ia Naomi mai alalafaga o Malie ma Foaluga, ma Vasa Toleafoa Oge ma le faletua ia Momotuolesolo Toleafoa mai alalafaga o Vailoa Faleata, ma o lea ua atoa i ai le to‘a 5 o Failauga talu ona faavaeina le Ekalesia fou ia Aperila na se‘i mavae atu nei.
Na mae‘a le sauniga onaf aaiuna lea i se taumafataga tele ma le felanunaluai sa saunia lava e le Faafeagaiga ma le faletua aemaise le paia o le Ekalesia auā le au valaaulia.
Sa saunoa le susuga i le A‘oa‘o ia Vasa Toleafoa e faafetaia le paia o le Ekalesia aemaise o vaega eseese i tapenaga uma auā lava lea aso tāua, ma tali fuaitau foi le failautusi o le Ekalesia, Susuga Taituave Faatoe ma toe faamalosi atili i le au faigaluega.
O la Iesu i ona ausoo, ‘o mai na o e tala‘i ma papatiso atu i nuu uma e fai ma soo. A outou o atu e tali leleia outou, ia outou faamanuia atu i ai, ae a outou o atu ae tali leagaina outou, ia outou tutu atu i ai le palapala.’
E tele fita ma faigata o le galuega e fetaiai pea ma tatou i aso uma, ae fai mai Iesu, i le Luka 14:27, ‘O se lē ave lona satauro ma ua lē mulimuli mai ia te au, e le mafai ona fai o ia ma o‘u soo.’
Manuia tele tofi ma tiute ua tofia ai outou e le Atua, ma ia manatua, o lou valaauina e mai le Atua lea.
