O le afioga Fonoivasa Lolesio Ah Ching itu tauagavale ua 68 tausaga o le soifua, ae ua faauu ma avea ma loia o le a galue i le faamasinoga i Samoa. E faapena se isi tamalii le afioga Lealiifano Dr Iopu Tanielu ua 66 tausaga o le soifua, ae ua faamanuiaina foi aoaoga ma ua avea nei ma loia faauuina mo galuega a le faamasinoga. O nei tamaliii e toalua e lauiloa i Samoa ona o a la tautua i galuega ma tomai faapitoa.
O Fonoivasa o se tasi sa avea ma leoleo sinia i le tele o tausaga ae sa see atu ma galue i le Malo ma avea ai ma Taitaifono o le Komisi e pulea tagata faigaluega mo ni tausaga se tele. Na tofia e avea ma faamasino o le Faamasinoga o Fanua ma Suafa e pei ona avea ai i le taimi nei ma se tasi o sui Pelesetene.
O se tamalii a fua i le matua o lona soifua ae e lei mapu lona sailiili pea i le poto salalau ma le poto aoaoina lea ua faaeaina ai i se isi tulaga ma tomai maualuga i le galuega faaloia.
O se tasi o tamalii e lauiloa i lana tautua o se fomai, le afioga Lealiifano Dr Iopu Tanielu, a fua foi i ona tausaga ua 66, e maeu foi lona sailiili pea. Ae na saunoa le afioga i le Faamasino Sili Patu Falefatu Sapolu i le sauniga na faaulufale ma talia ai nei tamalii faatasi ma isi loia e toalua, e ui ina faapea ua matua le soifua ae e lē o matua ai le olaga tauivi i nisi laasaga sili atu o le olaga.
O le maua o o la faailoga loia ma faaulufale i galuega a le faamasinoga, o se faitotoa va tele o le a liliu atu nei i ai e faatino le tomai e finau ai i mataupu tau i le tulafono.
Ua faaopoopo atu foi nei tamalii i le auaunaga faaloia o loo faatino e nisi o tamalii ma failauga o le atunuu faapea alii ma tamaitai aemaise o faletua ma tausi ua ausia lea tomai maualuga ma taualoa.
O le faaulufaleina o le afioga Lealiifano ma Fonoivasa sa faatino faatasi ma le faaulufaleina o nisi foi tamafanau ma alo o le atunuu ua maua faailoga loia e pei o le susuga Vaega Lei Sam ua 58 nei tausaga o le soifua faapea se tasi o tamaitai o le atunuu ua 47 tausaga o le soifua, o Sasa‘e Fualoatasi Walter.
O le a galulue foi i laua e pei o isi loia o loo faia lenei tautua i le atunuu. O moomooga lelei ma faamanuiaga i nei tamalii ma se faletua ua ausia lenei tulaga maualuga i le olaga tauivi i aoaoga.
