O lea ua tu nei i le Tula le Lupe a Malietoa sa faatafao i Matatoaga. Le lupe lea sa faalele, a o lea ua faaifo nei i le malae o le Talalelei. O se u foi sa fanatia i le lagi e le paia i aiga na lua auā sa latou ositaulaga. Lea ua faaifo nei i le Mauga o le Faaolataga a le Atua.
Ua pati taoto ai nei le Feepo ina ua a‘e malo ma a‘e i manū le faatamasoaliiga a se tasi o tamafanau e faasino i le afioaga o Vaiusu. O le paia lava lea i le susū ai o Seiuli o le alo o le Malietoa, susū le Falefia o alii, ae tainane le alalatai o le fetalaiga ia Ulugia ma le aiga sa Ulugia. Ina ua tofia e le Atua ma le Board ma le Ekalesia a le God of Victory Christian Church i Mangere Niu Sila, le susuga ia Ionatana Fiapule Kavesi ma le faletua ia Moana Kavesi, e avea ma faifeau tausi ekalesia.
O le Aso Sa, 3 Novema 2013 sa faatumulia ai lea ekalesia i le faauuina o lea foi faafeagaiga ma le faletua. Sa auai nisi o faafeagaiga ma o latou faletua, aemaise le paia i aiga na lua, uo ma ē masani sa auai faatasi i lea foi sauniga tele.
Faaalia le agaga faafetai o le susuga i le Tamā o le ekalesia a le God of Victory Christian Church, le susuga ia Tamaifuga Petelo Sai‘a i le Atua ona o le manatu mai o le Atua ma Lona amanaia o ona tagata.
Momoli foi le faafetai a le Tamā o le ekalesia i susuga i faafeagaiga sa auai ma o latou faletua ma uo ma ē masani i le auai ma lagolagosua ai mo lea faamoemoe. Faapea foi lona agaga faafetai i le paia o le ekalesia i ona tulaga tofi ma ona tulaga faalupe, ona o le lagolagosua i le tapenaina o se taumafataga tele auā malo ma le auvalaaulia sa auai.
O le susuga i le faafeagaiga ia Ionatana Fiapule Kavesi o se alo e faasino i le tamā matua ia Kavesi Lautasi o Safotu Savaii, ma si ona tina ia Tutumanu Laulu o Vaiusu Faleata. O le faletua ia Moana Kavesi o se alo e faasino i le fetalaiga ia Faumaua Folu Tuleaga ma le tausi ia Mariana Faumaua Tuleaga o Fatausi ma Sapapalii Savaii.
Ma o le aso 19 o le masina nei lava o Novema 2013 o le a tuua ai e le faafeagaiga ma le faletua ma le nofoaalo le la ekalesia o loo galulue ai nei, ae malaga atu loa i Ausetalia i le nuu o le a faataunuu ai lo la valaauina.
O le a malaga faatasi ai ma se tasi foi o toa le susuga i le a‘oa‘o ia Namulauulu Femitiai Vailoa ma le faletua ia Fiatele Vailoa, ua ofoina o la soifua e malaga faatasi ma le faifeau ma le faletua e lagolagosua ma fesoasoani i le tauina o le taua faaleagaga ma le amataina o le galuega fou i Ausetalia.
Ia o alofaaga ma faamanuiaga mai le ekalesia atoa a le God of Victory Christian Church i Mangere mo lau susuga i le faafeagaiga Ionatana Fiapule Kavesi ma le faletua ia Moana. Aemaise faamanuiaga mai i le Tamā o le ekalesia Rev Tamaifuga Talafu Petelo Sai‘a ma le faletua ia Vaaiga Sai‘a (nee Ah Lin). Ia faamanuia le Atua i la oulua galuega ma ia faamuamua pea le Atua i o oulua ala.
1 Korinito 15:58, ‘O lenei o‘u uso pele, ia outou tumau ma le lē faagaeetia, ia alualu lo outou faamalosi i le galuega a le Alii ma le lē aunoa, ina ia outou iloa e le o se mea faaleaoga lo outou tautiga i le Alii.’ 
