E ese foi lagona o le afiafi o le Aso Faraile na se‘i mavae atu nei, a o gasolosolo atu aiga, o uo ma aumea mamae, i le faletaumafa o le Buffet King i Great South Road, Manukau, ua luluaao ma faamalo atu i tamaitai talavou e toalua sa faaautū i ai le fiafia i lea afiafi.
Na auai uma le toatele o o la aiga, auā o tamaitai faauu, o Linda Taula ma Jennifer Huch, o i laua o se tausoga (cousins), o lea na tapena faatasi ai e nai o la mātua se taumafataga tele sa valaaulia ai aiga ma a la uo, aemaise o o la mātua faaleagaga ma sui o a la ekalesia o loo tapuai ai ma o la aiga.
O le taumafataga fiafia sa sami ma momoli faatasi ai le faafetai a mātua ma aiga, i nei tamaitai talavou, ina ua faauu mai le Iunivesite a Aukilani i le sauniga sa faia i le taeao o lea lava Aso Faraile, ma o la faailoga e tusa o mataupu sa aotauina ai.
O Linda Taula sa faauu mai lana Bachelor of Arts with a double major in Drama and Film, Television and Media Studies, a o lona tausoga o Jennifer Huch na faauu mai ma lana Bachelor of Arts with a double major in History and Pacific Studies.
E 4 tausaga na aooga ai i laua mo nei faailoga ma o le la molimau, sa o ni tausaga faigata ia la suesuega ma tuufaatasi atu i ai ma le tele o isi meafai i le aiga ma le ekalesia; peitai o le la faafetai lea i le Atua, ona sa la talitonu, i le faatasi pea o le Atua ia la aoaoga i nei tausaga uma.
Na la faafetaia foi o la mātua faaleagaga, le faafeagaiga a le EFKS East Tamaki, Susuga Eperone ma Mafa Futi, o le ekalesia a le tamaitai o Jennifer ma lona aiga, faapea foi le Susuga Lale ma Vini Peteru, o faafeagaiga o le Ekalesia New Vision Congregational Church of Samoa in NZ faapea foi Every Nation Christian Church, o loo tapuai ai le tamaitai o Linda ma lona aiga.
Sa faaleo le agaga faafetai o Linda ma Jennifer, ia i latou uma sa fesoasoani ma lagolagosua a o alo atu ia la aoaoga. Ae o le la faafetai silisili e mo la aiga, i si o la tina matua ia Fotu Fiu Aloese (Sili ma Fagamalo Savaii), faapea o la mātua Fiu Tali Taula (Gautavai Savaii) ma Melina Taula (Sili Savaii), o mātua ia o Linda Taula, faapea Fiu Suva (Iva Savaii) ma Aiaraisa Huch (Sili Savaii), o mātua o le tamaitai o Jennifer Huch.
Ua iu nei ma le manuia aoaoga sa feagai ai, ma ua tali faaaliali mai le Atua i le tautiga o mātua sa faamaoni ai i o latou tiute o le tausia o fanau.
Ae fai mai le molimau a tamaitai faauu: “A uma ona tatou faia o se mea, ona tatou faapea ifo lea, o i ma‘ua ua na o ni auauna faatauvaa.” Faamanuia tele le Atua i isi laasaga o le a lua agai atu i ai i le lumanai!
