O avanoa ua mafai ona aoaoina ai le tupulaga e lei maea aoaoga o tulaga lua lea ua vaaia ai se faauuga muamua ua faia i Samoa, o taumafaiga faapitoa a le Matagaluega o Aoga ina ia maua e fanau nei se isi avanoa e aoaoina ai i tomai eseese e mafai ona saili ai a latou galuega.
E ese mai i le matata eseese, o lenei aoga ua faaigoaina i le faa-Peretania o le Fast Track – ua mafai ai ona alu sa‘o lava le tama poo le teine talavou i le matata tau i faiaoga e ave le tausaga atoa e avea ai ma se tasi e molimauina galuega faafaiaoga i aoga laiti. A maea lea ona faatoa ulufale loa lea i le aoga lenei faafaiaoga.
O le isi tausaga atoa e aoaoina ai ona mafai loa lea ona maua le tusipasi e faataga ai ona faiaoga i vasega tasi e oo atu i le vasega tolu i aoga laiti a le atunuu.
O se taumafaiga lenei na unai e le afioga i le Ofisa Sili ua maliu atu o le Matagaluega o Aoga, Taaloga ma Aganuu, le Afioga Tautapilimai Levaopolo Tupae Esera ma na molimauina ai le tumutumu o le Matagaluega, aemaise o i latou ua mafai ona faauuina ma aiga ma uo i le maea ai o lenei taumafaiga.
O le unai a le Afioga Tautapilimai i le amataga o lenei taumafaiga ina ia amanaia e le Malo aemaise le vaega o loo ua nafa nei ma Tusipasi ma Faailoga Taualoa le laasaga fou lenei ma ave ai le avanoa i fanau e lei manuia taumafaiga i suega masani o Aoga maualuluga e pei o le School Certificate (tusipasi o aoga maualuluga) faapea le PSSC (tusipasi o Aoga Maualuluga a le Pasefika) ona maua se isi avanoa e aoaoina ai i se isi auala e mafai ai ona vave le pue i le tulaga tau i aoaoga ma ua taumafai ai i le tomai faafaiaoga le amataga o lenei polokalame.
O loo iai le faamoemoe o le Matagaluega ina ia faalautele lenei taumafaiga i isi tomai e mafai ona saili galuega ai le tupulaga talavou e lei maea aoaoga.