Laufofoga fiafia o Manu ma Fale ma si o la alo Lefaoalii Jeffrey Ropati ina ua iu manuia lona taumafai, Executive Master of Business Administration – Photo: Fiapaipaitamalii Tonuga

Na leai se mea e gata mai ai le fiafia tele ma le faagaeetia o aiga uma faapea le susuga i le toeaina ia Manū Tasesa Ropati (Lepā Aleipata) faapea si ona faletua ia Faaulufale Ropati (Saoluafata) ina ua vaaia si o la alo ia Lefaoalii Jeffrey Ropati ua savali mai ma lona pulou ma le ofu faauu i le lotolotoi o le fia selau o tamaiti faauu a le Iunivesete o Queenland University of Technology (QUT). 

Ua na’o Jeffrey lava le Samoa na filofilo ai i le toatele o tamaiti eseese na faauu mai i faaailoga eseese. E moni lava na faauu muamua i lona faaailoga o le Bachelor of Public Sector management i le QUT, peitai na matuai suia foi lagona o aiga uma lava ina ua ausia lenei laasaga i le MASTER.

O le Aso Tofi na faia ai le faauuga tele a le QUT, ae na fuafua lava le po o le Aso Toonai 27 o Iulai, e faia ai se fiafia tele na potopoto ai aiga ma se’i momoli atu se agaga faamalo ma le faafetai ia Lefao e tusa ma le tausinioga ua iu manuia ae sili le faafetai i le Atua ua tau ai lau o le faamoemoe. 

Na tutulala’i le aofia, usuina le pese a’o faataupati mai ai le sogaimiti i totonu ma ona foliga fiafia ua mou ese le pologa o le mafaufau. O upu masani, ‘E faafeao oe e le poto, e suamalie ia te oe le atamai’. Na taitaia se sauniga puupuu e le susuga ia Pr Suemalo Pauu mai le ekalesia S.I.S.D.A.C a South Side. Na lauga faafeiloai le susuga ia Nuualiu Ben e faafeiloai le paia o aiga ona faagasolo lea o polokalame o le po.

Na siitia upu o le Tusi Paia e le susuga i le toeaina ia Manū Tasesa Ropati (tamā o Lefao Jeffrey), “O le tama poto e faafiafia i lona tamā, lea e iai le tali ua momoli mai e Jeffrey. 

O ni ufi e tutupu i tino matagi lelei, o le agaga o le olioli ina ua avea le siitiaga o le taumafai o si ona atalii ua ia tuufaatasia ai ona aiga mai Samoa, Niu Sila ma isi setete o Ausetalia faapea uo ma aumeamamae. Ua lē faatasia ona o ni faanoanoaga, ae o loimata o le fiafia tele”.

O si ona tuafafine ia Peaario Juliet ma si ona alii ia Faasao Ah Kuoi sa vaavaalua i isi polokalame o le po. 

Lefaoalii Jeffrey Ropati ma ona matua ina ua maea le fiafia tele sa faia mo lona faauuga

Na tulaga ese foi vaaiga o le po e ala i faatalanoaga e ala i molimau o le soifuaga o lenei alii talavou, tulaga tau a’oa’oga ma lu’itau na ia feagai, aemaise le galuega na amata galue mai ai ae na ia tauivi lava e faatoilalo e lana sini le galuega piki fualaau’aina na ia amata mai ai. 

Na ta’ua e Peaario Opetaia (uso o le tina o Lefao Jeffrey) na ia talosagaina ona mātua na te liliuina o ia peitai i le faatoa 5 ona tausaga ae ona o le naunau lava faamatua na ala ai ona lē mafai ae sa faaauau pea lana tausiga e pei o sana tama moni. 

Saunoa Lefao Jeffrey e lē faagaloina le alofa o nai ona mātua e tutusa lava ma le agalelei o si ona aunty/tina ia Peaario Opetaia i le tele o taimi a’o itiiti e femulimulitai lava ia te ia seia oo ina matua.

O lana galuega e lē mafai ona galo o le taimi a’o faigaluega i le supamaketi o aso uma la te o lava ma si ona tina ia Peaario Opetaia, seiloga e mānava lana galuega faatoa la o faatasi i le fale, o iina na ia iloaina ai le alofa pei o se tina moni ia te ia. 

O nisi e aofia ai Brian Ane, Tina Smith, Kevin Vaa ma Cecilia Theodore na o latou talatala ni vaega lelei e manatua ai Lefao, ae o le ki o mea uma o le avea lea o lenei alii talavou o se faataitaiga lelei mo fanau a le aiga o tuputupu a’e. Na matagofie faafiafiaga o le po fiafia o Lefao, taumafataga, aemaise le matagofie o teuga na teuteuina e le susuga ia Tamalelagi Mata ma Bessie. 

Na faia faaaloaloga auā le susuga i le faafeagaiga ia Pr Su’emalo ma le faletua ia Fiapaipaitamalii faapea le aofia sa auai lea sa fai ai ma sui le susuga ia Faasao Ah Kuoi.

Na gata a’oa’oga a Lefao Jeffrey i le Year 10 i le aoga faaitumalo. O lona soifua galue (1) o se fruit packer i le supa maketi a Woolworths, (2) checkout operator ia Kmart, (3) Trainee i le Education Dept, (4) Dept of Premier & Cabinet mo le sefulu tausaga, (5) galue i Lonetona mo le 3 tausaga, (6) Sydney NSW Govt – 7 tausaga (7) Dept of Agriculture (current) Project Manager.

E atoa lona 40 tausaga ia Oketopa o le tausaga nei a’o lea ua ia taulimaina lona faaailoga o le Executive Master of Business Administration mai le QUT. 

Na saunoa Lefao, o le a lē suia lava lona tagata, e tutusa lava taimi uma ma tagata uma ia te ia, o lona mitamitaga lona auaiga, e lē galo lona faasinomaga e manatua foi le Atua e ou manuia ua ia maua. 

O le QUT sa a’oa’oina ai foi lona faailoga o le Bachelor of Public Sector management i le QUT.