Mo le lua vaiaso e ese le ituaiga poloka lea e vaaia i taeao taitasi i le auala lea e fesootai ai Lelata, Faatoia, Vaivase, Magiagi ma Fagalii.
E amata atu lava i le vaveao ona vaaia le laina o taavale agai mai i Magiagi ma Vaivase ma uia ai Faatoia auā ona pau lea o le auala ese mai i le isi itu auala agai i Moataa o loo faaaogā e taavale i le taimi lenei e agai ai i le taulaga o Apia.
Ua mafua lea poloka ona o le galuega o loo ua faia nei i le ā‘ega lea e agai mai ai i Lelata i Magiagi ma Vaivase.
O se galuega ua faia ona ua matuā lē mafai ona uia lea vaega o le alatele talu ai timuga o le tele o tausaga ua matuā tetele ai omoomo ma tau lavevea ai taavale ona o le alofia o le faaletonu o le auala.
Mo le uluai lua vaiaso na matuā eli atoa ese le vaega i luga o le ta o le auala ma e loloto lava le vaega o le alatele ua eli talu ai le taumafai o le konekarate fai auala a Rudy Ott Transport, ina ia sui le fua e fausia ai le vaega lea o le alatele.
O le fua fou lea na ta‘ua e lē sa avea ma Minisita o Galuega tetele a le Malo i le masina ua tuanai, le Afioga lea a Tuisugaletaua Sofara Aveau, ua faaaogā nei i auala fou ia ua fausia talu ai sa alu lava i fua tuai le fausiga o alatetele a le Malo ma ua lē o gatusa ia fua tuai ma le tulaga ua iai le faataatia mai o fanua ma auala tele.
Faaalia e se sui o le Konekarate a Rudy Ott, e telē le galuega ua toe faia ona o le taumafai e faalautele atu le alatele ma ia telē le avanoa e feoai ai taavale.
O le tulaga faigata ona e vanu uma autafa o lenei nofoaga ma e laititi lava se avanoa e mafai ai ona toe faalautele atu le auala.
O le isi vaiaso atoa la ua talosagaina ai le mamalu o le au fai taavale afi ina ia onosaia le umi o le poloka i taeao seia mae‘a lelei ona fai le ala tele lenei.
O se tasi lenei o vaega o galuega e tele mo le faaleleia o auala a le Malo na ta‘ua e lē na Minisita o Galuega, o le a faatino pe a mae‘a mai le Faiga Palota tele a le atunuu.
O lea e taatia galuega e fia faaauau mai i Faleata seia oo lava i le Malaevaalele faava o malo i Faleolo. Ua iai foi isi galuega e faaauau atu ai le toe fausia o le auala lea e i le magafa i Magiagi ma Vaivase ma agai atu ai i Faatoia ma Vaiala auā ua matuā tulaga faaletonu foi lea vaega o le auala tele a le Malo.
O Leone i le auala laupapa i le nofoaga lea ua ui tasi e le toatele ma o le vaiaso lenei atonu o le a mae‘a ai galuega o loo faia nei i Magiagi ma Lelata ma tau faamāmā ai loa ma le uumi o laina a taavale feoai i lea itu o le talafatai o Apia.
