Faaulufale malumalu a EFKS Satalo Falealili

O se aso matagofie na faatautaia ai le umusaga o se galuega tele a le mamalu o le Ekalesia Faapotopotoga Kerisiano Samoa i le afioaga o Satalo i Falealili.
O le Aso Faraile o le vaiaso na tea nei lea na tumutumu ai aiga, o uo, o sui o le EFKS ma isi ekalesia i totonu o Falealili e molimauina lenei aso tāua. Ua mae‘a le galuega na fitaituga ai le ekalesia i Satalo i le paia i alo o Fanene, le afio o Te‘o ma Fonoti, Paia i le Usoalii, mamalu o le aiga sa Talo, talo o le Maagao ma le uso na totō ma le latou matua sa Lele‘a ma le Laiuti na laulelei.
O le galuega e pei lava o le tele o taumafaiga a le Ekalesia ua tagi lava i lima lona faatinoga ma na vaelua mafutaga a le ekalesia i vaega e lua auā le sailiga o le tupe e fausia ai ma toe faaleleia le malumalu.
O le malumalu lenei na faaleagaina i le tsunami o Setema le aso 29 o le 2009 ma e tea loa le atoaga o le fā o tausaga o lenei faalavelave matautia ae mae‘a loa le galuega lenei e pei ona faamanatu ai i le vaiaso na tea nei.
O vaega e lua na vaevae i ai sailiga seleni o le mafutaga a le ekalesia lava ia i Satalo Falealili ma alo o le afioaga o loo faamautu ai i Niu Sila.
O le aofai o le tupe na maua i sailiga tupe uma e lua e $110,00 (tala Samoa) ma o le tupe lava lea na fausia atoa ai le galuega i lona toe faaleleiga atoa.
O le faafeagaiga o le EFKS i Satalo Rev. Fuatai Simanu na faamatala lava lona agaga faafetai tele i le tau fai tutū mai o le aulotu e faatino le latou galuega fou.
O le Faifeau Toeaina Faatonu o Aana, o ia foi o le Sui Taitaifono o le EFKS aoao Rev. Elder Tautiaga Senara na fai ma sui o le Ekalesia Faapotopotoga Kerisiano Samoa e faafetaia le galulue punoai o Satalo e fausia lo latou malumalu fou ma e $20,000 (tala Samoa) le meaalofa a le Ekalesia i le aulotu auā le faatinoga o nisi vaega o loo moomia pea i lenei galuega tele.
O le taitai o le sauniga, o le Faifeau Toeaina Faatonu o le EFKS i le itumalo o Falealili Rev. Elder Tumoso ma e pei lava ona saunoa taitai o le ekalesia, ana leai lava le lotonuu ma le tautua lotu o sui o le ekalesia i Satalo e lē mafai ona tino mai le galuega ua tatala nei.
E pei ona ta‘ua i lea sauniga o le momoliga o le faafetai a le susuga i le faafeagaiga o le aulotu lea, “E sili lava le manuia o lē foai nai i lo lē na te talia”.