Ua silia i le tausaga le taumafaiga a le Matagaluega o le Ekalesia Katoliko i le afioaga o Vailele ina ia fausia se malumalu tele mo lenei afioaga ma ona sui lotu.
O le mae‘a o lea galuega na faafetaia ai le loto toa, loto nuu, le faatuatua ma le vaai i le Atua mo le faamuamua a sui uma o lenei Matagaluega, e lē gata ia i latou i Samoa nei ae faapea ai i latou i atunuu mamao. O le sauniga tele na faaulufale ai lenei malumalu i le faaiuga o le vaiaso, na fofogaina ai feau tāua o le faatāua ua ave e le tagata i le Atua e ala i galuega faatino e pei ona iai mea nei o Malumalu.
O le taitai lava o le Ekalesia i Samoa, le Afioga i le Akiepikopo, Alapati Mataeliga, na feagai ma le sauniga atoa lenei o le faapaiaga ma ave ai foi le faamamafa o le faatāua ua ave e le tagata i lona talitonuga i le Atua. O le faatusa o le malumalu ua ave i le tagata soifua. “Sa fetalai Iesu e uiga i lona tino, o le malumalu lea”.
O le lagona foi lea na molimauina i le fofogaina ai o le tau saili ma le tagiilima a sui lotu ina ia mafai ai lava ona fau se malumalu e tulai mai mo le tautuaina o tapuaiga a le Atua i le tele o tausaga o lumanai.
O taalolo na amata mai lava i le aso a o loma ai le faaulufalega ma na vaaia le taofi o taavale i le tele o le aso lea a o faagasolo taalolo a i latou na masii mai e faamanatu faatasi ma Vailele lo latou aso tāua. O le aso o le tatalaga o le malumalu na faapea ona molimauina e le Afioga Mamalu i le Ao o le Malo, le Afioga Tui Atua Tupua Tamasese Efi faapea lana Masiofo le Afioga Filifilia Tamasese atoa ai taitai o le Malo, taitai o Ekalesia Kerisiano eseese i Samoa faapea ai foi taitai faaleaganuu – o aiga ua uo mamae lenei sauniga.
O le Afioga ia Masiofo Filifilia na feagai ma le ootiina o le lipine e aloaia ai le tatalaga o le Malumalu. Sa tauaaoina loa le ki o le Malumalu fou e le Matuaofaiva, Alo Vito i le afioga i le Akiepikopo ma faaulufale le mamalu na aofia auā le uluai Taulaga Paia o le Misisa.
O se tala otooto o le galuega, na ta‘ua ai o le aso 11 o le masina o Fepuari o le tausaga na tea nei na amata aloaia ai galuega o le Malumalu fou ma e tusa ma le 14 masina sa faatautaia ai le galuega.
E $93,846.79 le tinoitupe sa amata ai le galuega ma na faia sailiga tupe i atunuu mamao ma maua ai nisi vaega tupe ma faatinoina ai le galuega atoa.
O nisi o sailigatupe sa faia na tali mai ai le Mafutaga a le Matagaluega i Ueligitone i Niu Sila i le $117,810 tala Samoa, o le Mafutaga a Sini Ausetalia e $84,100 tala Samoa, Mafutaga Amerika Samoa e $18,000 tala Samoa, Mafutaga i Aukilani Niu Sila $112,169.30 tala Samoa ma maua ai le aofai e $332,079.30 tala tupe Samoa. O sailiga tupe i Samoa nei na maua ai le $403,970.80 tala ma o le tupe atoa o le galuega e $736,050.10 tala. O nisi o meatotino tāua mo le Malumalu na fesoasoani ai nisi o le Matagaluega. O le Mafutaga a tina o le Matagaluega, Setasio-Divine Mercy i Vailele na saunia faamalama lanu, o le logo na saunia e tamaitaisa Monike i Uvea Wallis atoa ai ma le Tapenakulo poo le Faatusa o Maria na saunia e tamaitaisa o Mapuifagalele.
O nofoa o le Malumalu na tapena lea e Futuna ma le pulelaa na ofo i ai le afioga ia Tia Siaosi ma Iuni o Letogo.
O le Aletale na saunia e Vitua mālōlō manumalo ia Katalina Iosefo ma le aiga, nofoa o le Epikopo o Tuiafiso Enele ma Susana ma faitotoa uma o le malumalu na saunia e Lapa ma Vasati o Vailele lava.
O le mae‘a ai o sauniga faapitoa mo le tatalaina o le Malumalu na faia ai ma le faapaiaga o le maa faamanatu o le Ekalesia Katoliko i Vailele o loo i totonu lava o le Malumalu fou.
O se galuega matagofie ma na molimauina e le toatele o aiga faapea uo a le Matagaluega Katoliko i Vailele ma o lagona o le fiafia na molimauina i le Matagaluega atoa ona ua mae‘a le galuega ma ua tu mai lo latou Malumalu fou.
O faaaloaloga masani na faaiu ai lenei aso tāua i le talafaasolopito o Vailele. E pei lava ona silafia o Vailele o le isi afioaga tāua lea i galuega a le Ekalesia Katoliko e pei ona iai le nofoaga mo tina ma tamā matutua lea e faatautaia e Tamaitai Sa o le Sisters of the Poor.
O le vaitau lenei ua le na o le Ekalesia Katoliko ua fai sao i ai i fesoasoani e tuu atu auā le tausiga o tina ma tamā matutua ua nonofo ai i lea nofoaga.
