O loo tālia i le taimi lenei se faamasinoga e faatatau i ni taulelea se toalua o le afioaga o Solosolo ua molia i le faatupu o se afi na mafua ai le faaleagaina o le maota o le Afioga Leota Leuluaialii Itu Ale, o se tamalii na faatulai ese e le afioaga o Solosolo i le tausaga na tea nei ae mulimuli ane ai susunu ona maota ma faaleaga ai le tele o ana meatotino.
O se mataupu ua tele tausaga o vaaia le feeseeseai ai o lenei tamalii ma le afioaga, ae o le ooooga o nei feeseeseaiga na vaaia ai loa le faatulai ese o le sui o le afioaga aemaise sa tulai mai foi o se faipule o Anoamaa i Sisifo ona o lona iai i totonu o lea lava afioaga.
O lea la ua i luma o le faamasinoga le mataupu i le mu o lona maota ae o lea ua tuu atu i le aso 19 o le masina nei le mataupu e faatatau i le lē usitaia e Leota Leuluaialii o faaiuga a le Faamasinoga o Fanua ma Suafa.
E ono (6) moliaga na muai faataatia i luma o le Faamasinoga faasaga ia Leota Leuluaialii ae o lea ua toe faaui i tua isi moliaga e fa (4), totoe ai na o moliaga e lua.
O le isi moliaga o loo faaauau mai e aofia ai le lē usitaia o le faaiuga a le Faamasinoga o le soloia o lana faiganuu na faapea ona lua ai nuu o Solosolo, peitai sa ia faatino se usu ma pati se ‘ava o se feiloaiga ma se tasi o le afioaga e suafa ia Leota Tusi i totonu lava o Solosolo.
O le moliaga lona lua e faatatau lava i le lē usitaia o le faaiuga a le Faamasinoga o Fanua ma Suafa e soloia lana faiganuu ae tuufaatasi ma le nuu tele, o le faatino lea o se tapuaiga faalenuu i se tasi o maliu i totonu lava o Solosolo. Na tulai le afioga Leota Leuluaialii i luma o le Faamasinoga ma ia talosagaina ai le toe tolopo o le mataupu ona o le fia malaga i atunuu i fafo mo ni faalavelave lē maalofia ma ua tālia e le faamasinoga ma toe tolopo ai lenei mataupu mo se tali a lea tamalii i moliaga aemaise o le faaauau ai loa o le iloiloga.
Ae mo taulelea ua tuuaia i le susunu o le maota ma meatotino a lea matai, ua faapea nei ona tālia le iloiloga o ia foi moliaga faasaga ia i laua.