
O le susuga Joe Keil na muamua umia ma faagaioia le faleaiga lauiloa ile lalolagi ole McDonalds lea na totogo a’e ai lagona ole atunuu ua numela tasi foi Samoa aua ua iai lea faleaiga e tumutumu iai tagata aemaise o fanau. Ile tuanai oni tausaga se tele sa umia ai e Joe Keil le pisinisi na manatu o ia ole a faatau ese. Ole alii faipisinisi i Amerika Samoa le susuga Tautolo Agaoleatu Charlie Tautolo na ia faatauina ma o ia foi na muamua faatu lea faleaiga i eleele o Amerika Samoa.
Ile tuanai ai o tausaga e tele o faagaioia lenei faleaiga i Samoa o lea ole a faatele atili ile faatutu o nisi faleaiga McDonalds se fa, e tolu i Upolu e aofia ai le faleaiga ile taulaga o Apia ma le tasi i Salelologa Savaii.
O isi nofoaga ole a iai le faleaiga ole Malaevaalele faavaomalo i Faleolo, o Vaitele ile vaega oloo iai isi pisinisi ma faleoloa tetele. “Ole a muamua faatele ma faafou le faleaiga i Apia ma ole a faaaoga iai masini faaonapo nei ua faaaoga e faleaiga McDonalds ile lalolagi”.
Ole finagalo lea ole aluu Pule Faatonu le susuga Tautolo. Na ia ta’ua foi a oo ina maea le f ddaafouga ole faleaiga ile taulaga o Apia ole a sili ona vave le auaunaga mo le atunuu ma ole a oo atu foi ile 121 nofoa mo tagata e tausasami ai.
A mae’a ona faasolo lea ole galuega e faatu le faleaiga ile malae vaalele i Faleolo ma ole a mafai ona tautua ai le manao o tagata e agai ile malae vaalele aemaise o nuu ma afioaga i lea itu o Upolu aemaise ole a faigofie ona afe iai tagata malaga mo Savaii, ae mulimuli ai faatu le McDonalds lava ia mo Salafai.
Ole faleaiga i Vaitele le isi galuega e sosoo ai ma oloo fuafua le susuga Tautolo e faaalu ai se tupe ei le va ole 6 ma le 7 miliona tala Samoa mo le laasaga fou ole faateleina o lana pisinisi. Ole a tatala foi nei faleaiga uma mo le 24 itula fitu aso ole vaiaso. “Ole taumafaiga lena oloo silasila mamao iai le pulega ole matou kamupani ma ose suiga lelei e maua ai nisi avanoa faigaluega mo tatou tagata i Samoa”.
Ole taimi nei e tusa ma le 67 tagata faigaluega oloo galulue ile faleaiga e tasi ole McDonalds i Apia, ae ole talitonuga ole a faaopoopo tagata faigaluega pe a oo ina tino mai le fuafuaga mo nisi faleaiga McDonalds i Samoa.
Ole amataga o lenei pisinisi i Samoa sa faaleo ai lagona popole ole auaunaga tau soifua maloloina ona o faamai le pipisi e mafua mai ile tausasami o tagata aemaise o fanau i meaai faaonapo nei poo fast food e vave ai ona aafia ile tino puta, toto maualuga, gasegase ole fatu ma le suka.
Ole aupega taua ile galuega tala’i a le auaunaga tau soifua maloloina ole aoaoina o tagata i auala silisili ma lelei e taofia ai le maua i ia gasegase ae ua tatou silafia ma iloa ole filifiliga a le tagata ole mea tupito lea e faia iai lana lava faai’uga.