“O le ‘ava‘ava e malo le muaulu ma topetope le gutu”Tuilaepa
Ua amata ona faapupusa ma tutu le afi o tauiviga o le palota tele o le 2011 ae toe tasi le tausaga ma masina ona oo lea i le aso o le a toe filifilia ai ni sui faipule o itumalo i le palemene. Ua molimauina le amata vevela o feupuaiga faaupufai o Malo poo polokiki ua aafia ai le vaega faaupufai fou o le Pati a tagata le People’s Party ma le taitai o le Malo i le alii Palemia. Talu ona aumai le faaiuga a le faamasinoga maualuga na togi ai i fafo le iuga a le Fofoga Fetalai e soloia tofi faipule o sui o le Tautua Samoa Party, e le o toe nofonofo le taitai o lea pati i le osofai o le faigamalo a le HRPP i ni pulu malolosi.
O le feiloaiga ma le taitai o le Malo i le alii Palemia na faaalia ai sona finagalo e tali atu ai i le finau mai a le taitai o le People’s Party ua tatau ona see ese le sui faipule o Lepa, ma le taitaiga o le Malo ma lana vaega faaupufai ona ua anoanoai faaletonu ua tulai mai i lana pulega. “Ua tele taimi alu vale i tulaga faapolokiki e leai sona atamai o iai, leai sona poto masani, e lei faipule foi muamua. O le ala lena ua ou tei ai ua na totofi le Malo. E tasi lava le tagata na te faia tofiga o le Malo ua na o le Silisiliese. O lena la ua laa i le matafaioi a le Silisiliese, ma ua ou le malamalama la poo ua fia silisiliese foi le alii loia”, na saunoa ai Tuilaepa. O le finagalo lea o le palemia e faasino i se mau a le afioga Maposua Toleafoa, ua tatau i le faafaletui o le HRPP ona toe saili so latou taitai.
“O le vaega lenei e 39 o lauia uma, e leai se isi e faaletonu. O le taimi ou te alu ese ai o le 30 foi lena ma ona tupu o Palemia aua e agavaa uma. Afai e alualu sau le filifiliga o le sui o Faleata i Sasa‘e poo Safotu o le palemia lena o Samoa. O lona uiga a tatou talanoa i lauia, o i‘a o le loloto e le soona gaoia. A faatusa i i‘a o le papau poo i‘a o le apitagalu faapei o le ‘ava‘ava, e leai se mea e aia ai fua le ‘ava‘ava i i‘a o le loloto. O le ‘ava‘ava ia, e pau le mea e lelei ai o le malo o le muaulu, ma topetope le gutu. O lona foi ia lena tiute na tofia i ai o le faamama lelei o le apitagalu ma le aloalo aua taelega a tulisi mai fafo. E leai la se mea e finau ai fua le ‘ava‘ava, aua a oo i le taimi ua fa‘i mai e le silisiliese se i‘a, ia o le tulaga lena, e pei ona ou fai atu e 30 palemia ia e i le vaega lenei. Fai pea si ana ia i‘a, o i‘a o le papau e faapena”… o se isi lea finagalo o le palemia.
E lei mafai ona tuusao mai se tali a le palemia ina ua tulitatao e le tusitala i se fesili, pe faamata e le o lea ua amata ona taavili i tua faatosina a nisi sui o le HRPP e suia ai le taitaiga o le pati. Peitai na vave ona saunoa le alii palemia, e soo se tagata lava na te taumafai e faatino sea taumafaiga e muamua lava ona ia silafia, e pei ona manino mai i le mau a le taitai o le People’s Party. Sa faailoa foi e Tuilaepa faiga faavae a le HRPP i le filifilia o ona taitai, lea a maea se faigapalota ona saili lea o finagalo o sui o le faafaletui. O ai lava ua tasi i ai o i latou ia e tauaveina le taitaiga mo le paeaiga atoa faapalemene, sei vagana ua alualu ae toe iai se isi finagalo o le pati e sui le taitaiga. Na fesili le tusitala pe faamata la e le o lea ua tau aliali mai se lagona o nisi sui faipule i le faia o se suiga o le taitai. Peitai sa atagia mai i le tali a le alii palemia, e le mafai ona tupu lea tulaga ona o loo mauaa le faatuatuaga o le pati ia te ia.
O faaletonu na malepe ai le HRPP i nisi o tausaga ua tuanai na avea ma aoaoga lelei na faavae ai nisi o faiga faavae a le vaega faaupufai ua mafai ai ona maopoopo ma faatumau pea lona malosi e pei ona molimauina i le silia i le 20 tausaga o tu pea i le foe o le taitaiga o le Malo o le atunuu. O se fautuaga lea a le alii palemia i pati laiti e aofia ai ma le People’s Party, ina ia muamua faatino faiga e maopoopo ai a latou vaega, aua o loo molimauina e ono le maua se maoopoopoga o pati laiti uma o loo galulue mo le palota tele o le 2011, pe afai o loo iai le naunautaiga o taitai o vaega taitasi e avea ma palemia o le atunuu i le lumanai pe afai o le a taunuu le sini o o latou faamoemoega o le suia o se faigamalo fou, ae faatoilalo le HRPP.
