A o iai pea le lalolagi i vaitaimi faigata o le pau maualalo o le tamaoaiga aemaise le tau sueina o ni galuega e le gata i tagata matutua ae faapena foi i fanau ua iu mai aoga ma kolisi maualuga, ua iai se polokalame tau aoaoga aemaise le soifua lautele ua faatupeina lea e le Tertiary Education Commission, ma faagaioiina e le Canterbury College e fesoasoani ai mo tagata Pasefika o loo tau saili ni galuega i totonu o Kalaiesetete.
O lenei polokalama e pei ona amata mai i le aso 22 Fepuari, 2010 o loo faatautaia e le tamaitai pule Miriam Connor ma lana aufaigaluega, ma o loo galulue fesoasoani ai nisi alo tamaitai o Samoa, o Vienna Moemalo ma Kate Petero.
E lua ni poloketi anoa o loo faaalu i le taimi nei e pei o le Pasifika Money Plan lea e fesoasoani ai i aiga aemaise tupulaga mo ni auala tāua e sefeina ai le tupe faaalu i mea le aoga, o ituaiga teuga tupe eseese aemaise o se malamalamaaga i le fuafua tatau ina o le tamaoaiga ina ua maua lea avanoa.
O le isi o poloketi o le saunia ma le tapenaina o se tusi ata (family album) e faamaumauina ai lea augatupulaga o le faasologa o se auaiga (family tree) ina ia faapena ona faagasolo pea i le lumanai mo isi tupulaga fai mai, ma ua fai ma avanoa matagofie e fesootai atu ai i latou o loo auai i lea polokalame i nisi ofisa o le malo e pei o le Internal Affairs mo aso fanau, aso faaipoipo atoa ma aso e tuua ai le ola nei. I se faatalanoaga a le tusitala ma le tamaitai pule, Miriam Connor na ia taua ai, o se isi faataua o lenei faamoemoe o le aveese mai ai o tupulaga Pasifika saili galuega mai le aiga ae faaaoga sia taimi mo nisi foi mea aoga e tului ai lona self esteem.
A o faagasolo pea la lenei polokalame mo le ono vaiaso, ua mafai e le auaooga ona asiasi atu i faletusi i New Brighton ma maua avanoa e faatalanoa ai ma lea foi matagaluega, ae maise o faletupe pei o le National Bank ma le Kiwi Bank lea o loo galulue ai nisi alo o le Pasefika.
E toatele aiga Paefika o loo iai i lenei polokalame aemaise foi o nai tupulaga Samoa, pei ona lipotia mai le agaga fiafia o tamaitai o Faamanatu Tafili ma Joanna Burton i le anoa ma le aoga o lenei poloketi mo i laua a o iai i taimi faigata o le saili o galuega.
Na ofaina mai e Lima Magele mai le Matagaluega o Aoga ni fautuaga aoga mo le aufaigaluega aemaise students e uiga i child care options mo tagata Tonga ma Samoa ma o se fiafiaga foi lea ua fai ma faamama avega.
O loo faapea foi ona soosoo tauau mai le matagaluega o le Ministry of Pacific Island Affairs ma le WINZ aua lava le fesoasoani mo le faalauteleina o lenei polokalame mo tagata Pasefika aemaise ai o se faatalosaga mai le tamaitai pule o Canterbury College mo se avanoa e faatalanoa ai students e tusa ma le tomai ua maua, i l luga o le auaunaga a le leitio Penina o Samoa i lalo o le faamalumaluga a le Canterbury 96.9 Plains FM.
Ta‘ua e Miriam e iai le faamoemoe o lenei polokalame e faaauau pea ona e telē sona tēua ma le aoga mo tagata Pasefika i totonu o Kalaiesetete.
