‘Sulutupe Faoagali Family Reunion 2013’ – Compton, California, USA
O se faamoemoe ua taunuu, e mitamita ai le agaga. Faauta, o se vaaiga ina a matagofie ma matalasi, pe a faatasia ma mafuta aiga. Ae o le faafetai silisili, ona o le tausiga ma le agalelei o lo tatou Tamā o i le lagi, auā ana lē seanoa o Ia, semanu ua na o se foe e faaee i le tau o tatou manaoga uma.
O lagona o le fiafia ma le faagaeetia, o lagona o le loto aiga ma le nonofo fealofani, feoeoeai ma le fusia i le loto e tasi pe a mafuta aiga, o lagona ia e faagalogatā i soo se tagata. I totonu o le fitu aso mai lava i le Aso Gafua, 22 Iulai seia oo i le Aso Sa, 28 Iulai, sa faataunuuina ai le uluai faatasiga faaleaiga a suli, alo ma tamafanau na tupuga mai i le tuaa sinasina ua faiilagi le folauga, le tina matua ia Sulutupe Lūlū Faoagali, mai i alalafaga o Siumu ma Laulii, Amerika Samoa.
Na faamanavaina e le Atua le soifua auauna o le tina, ina ua silia ma le 100 tausaga o lona soifua i le tausaga e 2008. O se tofa na a‘e i sui o augatupulaga e fā o loo soifua mai pea, e tauala mai i alo alii ma tamaitai e toasefulu o le tuaa sinasina ia Lūlū, na mafua ai ona talimalo ma amata tapena e alo o le faletua malolo manumalo ia Lina Vaevae Eteuati, o loo alala i Compton, California, lenei faatasiga.
Mai i lea toasefulu o alo ma tamafanau a le tina ia Lūlū, ua maliliu le toaono ae toafā toe ulutaia tuaa sinasina o loo soifua pea.
Na faataunuuina lenei uluai mafutaga faaleaiga, i totonu o le aai o Compton, i le Setete o Kalefonia i Amerika. O se mafutaga sa maitauina le taupati ma le auvasa mamao atu o tauāiga e lē gata o ē alala i Niu Sila ma Ausetalia ae o Samoa foi ma Amerika Samoa faapea Hawaii ma isi Setete o Amerika.
O se mafutaga e lē gata sa toe lalaga ai lagona o le lotoaiga ina ua poto moli i le futiafu e tasi, ae o se mafutaga foi sa fefaasoaa‘i ma toe faafouina faaleagaga ai foi aemaise o le itu i le tausiga i le tino ona o le felanulanuai o le tamaoaiga o ia atunuu.
Ua pei ai lenei faatasiga o se laau e tasi ae ua tupu ma tālaulau ona a‘a, e faapei ona tele lālā ae tino e tasi ia Keriso.
Ua alo atu nei lenei mafutaga, mo la latou faatasiga lona lua e faia mai i Niu Sila ia Novema 2015 (pe a aulia manuia i se laolao mai i lo tatou Tamā o i le lagi), o le a talimalo ai suli, alo ma tamafanau o le faletua tuaa sinasina ia Tina Timu Faoagali, o le afioga ia Te‘o faapea le tausi tuaa sinasina ua faiilagi le folauga, ia Luisa Kaisarina Faoagali – Fea Gago aemaise o nisi o le aiga lautele o loo alala i Niu Sila, Ausetalia ma Samoa.
