Na matua faatumulia le faletaalo o le Malo i le Faleata Gym #1 i le maimoaina o le uluai fusuaga faavaomalo o le Pacific Rim Boxing Championship (PRBC) lea sa faia i le Aso Tofi a o lumanai le sisiina o le tagavai o Samoa i le Faamanatuina o le 50 tausaga o lona Tutoatasi i Apia.
E 12 paga o le po e aofia ai paga faapolofesa faavaomalo e 4 ae 2 paga faapolofesa a Samoa faatasi ai ma paga ‘amateur’ e 6; e 3 paga i le va o Amerika Samoa ma Samoa mo le Ipu a le Palemia, ma paga ‘amateur’ e 3 i le va o tama fusu mai Savaii ma tama fusu mai Upolu.
I paga ‘amateur’ faaopopo i le va o Savaii ma Upolu na manumalo ai Sinapapa Leao o Upolu ia Toelau Faaumuumu o Savaii i le aupaga Light Welterweight. Peitai na manumalo Sui Palauni o Savaii ia Nuusa Leafa o Upolu i le aupaga o le Welterweight, faapea Ivalua Pei o Savaii na manumalo ia Orlando Lefaoseu o Upolu i le aupaga Light Heavyweight, ma manumalo ai Savaii i le taamilosaga.
I le Ipu a le Palemia i le va o Amerika Samoa ma le aufusu a Samoa, ua faoa ai nei e Amerika Samoa le Ipu ina ua manumalo Kelepi Fata ia Higoma Liuvai o Samoa i le aupaga Light Welteweight faapea Siaosi Tanoa o Amerika Samoa ia Lualima Tokiana o Samoa i le aupaga Middleweight. Tasi le paga na manumalo ai Samoa ina ua faia‘ina Raide Tuala o Amerika Samoa ia Posala Peo o Samoa i le tu‘ioti i le aupaga o le Super Heavyweight.
O paga faaopoopo faapolofesa e lua a Samoa na fetaui ai Michael Fonoti ma Tony Iapesa i le aupaga Welterweight, lea na manumalo ai Michael i ‘ai, ma ua sauni atu nei e lu‘i le fusi o Samoa o loo ia Oli Filimaua i le fusuaga o le Sisigafua o le tausaga fou.
O se tasi o paga pito i mataina o lea afiafi o le taaloga a Francis Mamoe ma Farani Tavui i le aupaga Cruiserweight lea na tuuina atu ai e faamasino le manumalo ia Farani Tavui i ‘ai.
I paga faavaomalo o le Pacific Rim Boxing Championship na fetaui ai Too Mitai o Samoa ma Atalili Fai o Niu Sila i le aupaga Light Heavyweight lea na taofia le fusuaga i le taamilosaga muamua ina ua lavea lelei Atalili i le taumatau o Too ma manumalo ai i le tu‘ioti.
I le aupaga Cruiserweight na fetaui ai Sapeti Muga Asiata o Samoa ma Alapati Aasa o Amerika Samoa ma manumalo ai Alapati i ‘ai.
I le isi aupaga Light Heavyweight na fetaui ai Iosia Nanai o Samoa ma Richard Hackney o Peretania i le 6 taamilosaga, lea na auaufaatasi faamasino e tuuina atu le manumalo ia Iosia.
O le paga faapitoa o le po na fetaui ai Gogosina Ulutoa o Samoa ma Amosa Zinck lea sa avea ma siamupini o le aupaga Heavyweight a Niu Sila i le 6 taamilosaga, ina ua le mafai e le alii o Bob Mirovic e faafā ona siamupini o Ausetalia, ona malaga atu i Samoa ina ua faamanu‘alia i koleniga.
I le iuga o le fusuaga e toatasi le faamasino na tuuina atu le manumalo ia Gogosina, toatasi le fa’amasino na tuuina atu le manumalo ia Amosa ma le faamasino na tutusa ‘ai mo Gogosina ma Amosa ma tulai mai ai le iuga o le ‘majority draw’.
O se tasi o vaega mataina o lea po o le tuuina atu lea o pine taualoa ia i latou sa tautua i fusuaga. O pine taualoa mo faifusuaga (promoter) na tuuina atu i le Afioga Seuamuli Kurene ma le afioga Tufuga Fatu.
O pine taualoa mo faiaoga na tuuina atu i le afioga Tapumanaia Francis Wulf ma le afioga Lauano Uila Patu. O pine taualoa mo tama fusu na tuuina atu ia Tuisalogo Mike Leu‘ii, Pat Foyer ua maliu ma Gaono Jack Schmidt.
