Ua tatala atu nei e le Komisi suesue mo le faatumauina o le mamalu o suafa matai, le avanoa i tagata Samoa o alala ma aumau i atunuu i fafo e faaali ai ni o latou lagona ma finagalo i lenei suesuega tāua. Ua atofaina ai e le Komisi le Aso Lulu, 30 o Iuni 2010 e faagata ai le tauaaoina atu o ia molimau tusitusia. O lona uiga e lē tau malaga i Samoa ae faaoo atu finagalo tusitusia i le tuatusi o le imeli, attorney.general@samoa.ws
E toatele tagata o le atunuu o aumau i fafo ua lagona le agaga o le fiafia i le avanoa ua maua, auā o se avanoa tāua e lē aumaua. Pau le itu o loo faaseā ai nisi, o le lē tofu avanoa i ni fesootaiga komepiuta e mafai ai ona imeli o latou finagalo faaalia. Peitai o loo iai le talitonuga o le a mafai ona felagolagomai i latou e maua lea avanoa ma nisi e lē maua, mo le faaooina i Samoa o finagalo ma manatu faaalia e pei ona saunoa se sui o le Komisi suesue.
Ua talosagaina le atunuu o alala i fafo ina ia faamanino lelei o latou suafa ma suafa o i latou o le a tuuina mai e avea ma molimau o ni finagalo tusitusia. O le vaiaso nei ua faailoa mai ai e le ofisa o le Loia Sili, le tatala o lenei avanoa mo tagata o lo tatou atunuu o alala i fafo i atunuu e pei o Niu Sila, Ausetalia ma Amerika faapea isi atunuu o aumau ma nonofo ai tagata Samoa, ma o se avanoa lelei auā e tāua lenei mataupu.
Le matafaioi a le Komisi Suesue:
1. “Ia suesueina faatinoga o le Fuaiupu 20 o le Tulafono o Fanua ma Suafa, ma ia agai tonu lava i mataupu e pei o le, ‘toe Iloilo Tu ma Aganuu a Samoa e faasino i le faaeeina o suafa matai ina ia tagofia ai ma itu tāua (i) pe tatau ona faatapulaaina le aofai o i latou o le a faaee i ai se suafa Matai (ii) afai o le a aliali mai e toatele ua fia matai i se suafa, o ā suiga tatau i tu poo tulafono foi e tatau ona faia e taofiofi ai le soona faatoatele o nofo i se suafa matai e tasi. (iii) Pe afai foi ua iai se taofi ua fulisia i le tulaga o le tausi mamalu o suafa matai, i le taofia lea o le soona faatoatele o latou e umia se suafa, pe tatau ea ona faatapulaa na o nisi o igoa iloga o faavae o nuu poo na o nisi foi vasega o matai?”
2. “Ia suesueina pe tatau ona toe tapena nisi tulafono toe teuteu e faatino ai ni fautuaga o le a faatulai mai e lea Komisi Suesue.”
O le aso 4 o Mati na pasia ai e le Kapeneta le fautuaina o le Ao Mamalu o le Malo e tofia se Komisi Suesue mo le Faatumauina o le Mamalu o Suafa Matai. O le aso 12 o Mati 2010 na tofia aloaia ai e le Ao Mamalu o le Malo, sui o le Komisi e aofia ai:
1. Tofa Le‘apai Asofou So‘o – Taitaifono
2. Tofā Tafa Sa
3. Afioga Leaupepe Kasiano
4. Tofā So‘oalo Faatoafe
5. Tofā Seve Imo
6. Afioga Atanoa Niu‘ula
7. Tofa Apulu Lio
8. Susuga Fuaolefau Lote Naseri
9. Susuga Maulolo Le‘aula Tavita Amosa
10. Sarona Rimoni – Loia Faufautua, Ofisa o le Loia Sili
11. Salote Wright – Loia Faufautua, Ofisa o le Loia Sili
