Ua faalauiloa mai e le tamaitai tusiata (artist) mai Aukilani, o Natalie Stamilla, ua faamautu nei se seleni e faatupe ai le galuega tele mo le vaneina o le ata mataina o se tasi o toa o le Olopeleki, ae o se alo o Samoa, Laauli Michael Jones, ina ia faatulaga i totonu o le malae autū o le lakapi a Aukilani, le Eden Park.
O lenei galuega, e faamanatu ai le taimi na maulu atu ai Jones ma laasia le laina sikoa mo le uluai ‘ai o le Olopeleki, i le taaloga muamua lava na tatala ai le Taamilosaga Lakapi mo le Ipu a le Lalolagi i le 1987, o le taaloga na faia i Eden Park.
O lenei atavane, e tusa ma le $300,000 le aofaiga o se seleni e faaaluina ai, o le a faaaogā ai le apa memea (bronze) e fausia ai, ma o le a matuā sili atu ona matagofie pe oo ina mae‘a le galuega. Ua iai le fuafuaga e faatulaga i totonu o le malae ua toe faafouina nei i Eden Park.
O le kamupani a le Contractors Bonding Ltd (CBL) lea ua ioe e latou te saunia le seleni mo le fausia ma faatulaga lenei atavane mataina.
O lenei galuega tele na faalauiloa e le media i le tausaga talu ai, peitai na iai ma le faamatalaga faapea e ono lē oo ona faataunuu ona o le faaletonu i le tulaga tau seleni. Lea la na faalaa ane ai le kamupani lenei a le CBL ma ofo latou te faatupeia le galuega, e tusa ai o se faamatalaga a le Pule Sili, CEO Peter Harris. Ta‘ua e Harris, e tāua tele le faataunuu o lenei galuega, o le ala lea o le malilie o le latou komiti faatonu o le a latou fesoasoani.
Saunoa Harris, ‘e lē gata o se faailoga lenei o lagona mitamita o Niu Sila i le latou taaloga, e pei ona iai foi le nofosauni atu mo ana taliga malo i le Ipu a le Lalolagi i le faaiuga o le tausaga, ae o se maka lelei foi mo le latou kamupani auā o se kamupani e fai pisinisi i soo se vaega o le lalolagi, ma o se mitamita lea ia latou le iai o so latou sao e lagolago ai i se tasi lenei o atina‘e e sili ona tāua ia Niu Sila, o ana taaloga lakapi.’
Ta‘ua foi e Harris, ua matuā talafeagai lenei ata faamanatu mo Michael Jones, auā e lē gata o ia na uluai tataoina se sikoa mo Niu Sila i le uluai Taamilosaga Lakapi o le Ipu a le Lalolagi, ae ua iloga lona tulai mai o se tagata taalo a Niu Sila ua telē sona sao i le faaaafiaina o isi tupulaga a le atunuu i lenei lava taaloga o le lakapi, e lē gata o Niu Sila ae o Samoa foi ma isi atunuu o le lalolagi.
O le atavane e fua i le ata moni na pueina e le tamā o le tamaitai vaneata, Natalie Stamilla, o lona tuaa o Geoff Dale, sa galue o se pueata mo se nusipepa i lena taimi o le Ipu a le Lalolagi i le 1987, ma ia pueina ai le taimi tonu lea na tatao ai e Jones le polo i lana uluai sikoa.
E iai le talitonuga o Stamilla, o le faatulaga ai o lenei atavane i totonu o le malae, o le a avea ma mataaga matagofie mo soo se tasi e agai atu i le Eden Park e maimoa.
O le nofoaga o Artworks Foundry i New Lynn, o le a amata ai ona tufaatasia atoa lenei ata, ma o loo iai le faamoemoe e tatau ona oo atu ia Aukuso ua mae‘a atoa le galuega ma faatulaga loa i lona nofoaga i Eden Park, ina ia iai iinā mo le sauniga amata o le Ipu a le Lalolagi i le tausaga nei.
