Ua amata le tausaga e 2010 ma le tele o nisi atinae ma fuafuaga matagofie, e pei foi ona iai le faamoemoe o nisi o alo ma fanau a Samoa, o i latou o loo alaala ma papaaao i atunuu i fafo e ese mai Samoa.
E pei ona iai le Aso Toonai, 2 o Ianuari 2010, na oso a‘e ai se faamoemoe fou o le lumanai manuia o alo ma fanau a Samoa i tupu ma tamalii, failauga, faletua ma tausi faapea le tupulaga talavou i tama ma teine o loo laeiina le tatau poo le malu a Samoa, ina ia faatuina se asosi a le Lagimalofie a Samoa lava latou i Ausetalia, aua le faamaopoopoina o le tu ma le aga i fanua a fanau lalovaoa a le atunuu o loo fia silafia le olaga faataulealea a le sogaimiti ma le teine taupou i le fale o matai faapea foi le va fealoai i aiga, ekalesia ma soo se nofoaga faitele e iloa ai le Samoa aoaoina.
Ina ua fesiligia e le vaega o talafou le afioga ia Su‘a Suluape Petelo o le faatamā o le asosi mai le afioaga o Faleseela Lefaga ma o ia foi o se tufuga ta tatau sa fitaituga ma le galuega i Ausetalia i le tele o tausaga ua mavae seia oo mai i le taimi nei e uiga i le faamoemoe na ia taua ai e faapea.
O le foi mai Samoa i nisi o faamoemoe sa faataunuuina ai i le faaiuga o le tausaga 2009 o lenei lava matafaioi o le asosi a le Lagimalofie na a‘e ai sona lagona ina ia tatau foi ona mafai ona faia lenei auaunaga i Ausetalia ma o lea na ia taloina ai se fono i nisi o alo sa ia galueaina le taina o a latou malofie, ma na taliaina e le toatele o alo Samoa faatasi ai ma nisi sa taina a latou tatau i isi foi tufuga ta tatau o le atunuu.
Sa taliaina le fanoga ma o lea na amata ai loa i nisi lava o alo Samoa faatasi ai ma se alii papalagi Ausetalia ua uma ona ta lana pe’a e amata loa le asosi. Sa saunoa foi Suluape e le o faapito augafa le faamoemoe na o e sa tata ia te ia ae o loo tatala lava le avanoa i soo se tasi sa taina i nisi tufuga ta tatau.
Sa fesiligia foi e talafou le tofa ia Tuautu Tago Samaauga mai le afioaga o Laulii ma Fasitoo-Tai o le taitaifono sa filifilia i lea Aso Toonai 2 o Ianuari 2010 le auga autu o le asosi ae na ia taua, o le aga i fanua lava ina ia aoaoina i tupulaga lalovaoa o le atunuu ma ua faamoemoe o le aso 30 o Ianuari i lona Aso Toonai o le a amatalia ai le i se ava o le feiloaiga e faatinoina ai le tu ma le aganuu ona faagasolo lea i nisi o tautua a le taulealea Samoa i le sogaimiti ma le teine taupou le malu i lana ia foi matafaioi i le fale o matai aemaise nisi o talatuu ma tala o le vavau o le a mafai ona faasoa ai ma tufa atu mo le mamalu o le asosi.
O lenei vaega ina ia tumau ai pea i le loto ma le mafaufau o le tama ma le teine Samoa le taua o lona faasinomaga ma lona tupuaga o le Samoa moni, e ui lava e le o iai se atoatoa o tupu ma tamalii faapea foi failauga i le aganuu ae faamoemoe lava i le tofa fetufaai ma le faautaga fefaasoai e manuia ai le asosi ma le faatauaina o le tu ma le aganuu a Samoa, o le fetalaiga mulimuli lea a le tofa ia Tuautu i le sui o talafou.
O nisi o le asosi sa mafai ona auai atu i lea Aso Toonai o Afiafi Alai Futialo o Levi Saleimoa, John Ioane Laupepa o Faatoia ma Mulifanua, Max Schuster ma John Schuster o Faleapuna, Pio Aki Tauiliili o Safotulafai, Vasa Lauvao o Fagaloa, Samaauga Samaauga o Laulii, ma Michael Suluape o Faleseela Lefaga ma Malie faatasi ai ma le alii papalagi Ausetalia o James Ellison o sogaimiti ia.
O malu o Fou Lauvao o Savaia Lefaga, Meri Tausaga o Laulii, Julian Samaauga Vailuutai ma Laulii ma le tamaitai Cook Island o Tamara Schuster.
Peitai e ui ina faafesootai atu le toatele o alo Samoa e fia auai i lenei asosi ae ona o avanoa ua le mafai ona paaau atu ai, ma le faamoemoe i le Aso Toonai 30 o Ianuari 2010 o le a faatasia ai mo le amataga fou o lenei asosi i totonu o Ausetalia. I lenei lava avanoa ua mafai ona faalauiloa atu ai i nisi o alo Samoa i Ausetalia lava latou ia numera mo lenei asosi i le lumanai.
Su‘a Suluape:
(02) 86785285, mob: 0451011917
Tuautu Samaaauga:
(02) 46277846, mob: 0412077376
