“Ia maopoopo lava i le loto e tasi ma le manatu e tasi”
O le galulue faatasi ma le faamoemoe e tasi o le Sini lea ia taulai i ai le silasila, soo se mea e iai le toatasi poo le toalua, ona o Lona Suafa e iai faatasi ma i latou.
Ua le o le toatele e sili lea, a o le lototetele i le Alii ma Lona Mana e taua lea, o nisi ia o upu faalaeiau na saunoa i ai le afioga i le Sea o le sinoti i Niu Sila i Saute, Rev Savaii Loto i le sauniga faapitoa o le faatuina o le aulotu fou i Ashburton.
Na faatumulia le malumalu i Tancred St, Ashburton i le Aso Toonai, 20 Mati 2010, i le mamalu o le aufaigaluega a le Atua mai matagaluega eseese o le sinoti i saute, e le gata i lea o le auvalaaulia na mafai ona auai, le susuga i le misionare EFKS ma lona faletua, Rev Petaia Lima ma Gina, le susuga i le Epikopo, le paia o le mafutaga a Samoa i totonu lava o Ashburton aemaise sui o aulotu na malaga mai pitonuu tuaoi o Kalaiesetete, faifeau malolo Rev Silipa Mamea ma Rev Elisara Elisara, e molimauina lenei sauniga faapitoa.
O le susuga i le alii misionare, Rev Leauma Faalafi ma lona faletua o Fiapalagi i luga o le tofiga a le Koniferenisi aoao na valaaulia ai i laua e galulue faamisionare i totonu o Asburton, lea la e lei atoa se tausaga ae ua maua nisi agaga fou mo le ekalesia.
O lona lua ai lenei o aulotu fou ua faatuina e ala i le aoao manogi a le alii misionare i tafa o le motu i Saute e saili tagata mo le galuega a le Atua, e pei la ona iai nei le matagaluega fou i Halswell i lalo o le taitaiga a le susuga i le tausi matagaluega Rev Poasa Leau.
Na taitaia lava le sauniga lotu e le afioga i le Sea o le sinoti, Rev Savaii Loto, o le tausi matagaluega Rev Kolani sa saunia le tatalo ae faitau e le failautusi o le sinoti, Rev Ropeti Enoka le Tusi Paia.
Na logo faa-Tutuila le faafofogaaga e na auai i le sauniga a o fofogaina e le failautusi o le sinoti le tolaulauina o suafa o aiga e toasefulu ua faavaeina lenei galuega fou. Na tutulai le mamalu o le aulotu fou i luma o le faapotopotoga, atoa ma luma o le Atua e folafola ma ofoina atu lo latou soifua e auauna ai i le alofa o le tasi i le isi ae le o le fevaevaeai.
Na saunoa le taitai, Rev Savaii Loto ma toe faamanatu le galuega a le aposetolo o Paulo, o ia o le tagata faatu lotu, o le ipu na filifilia e le Atua e momoli lona finagalo i nuu ese, e iai luitau o le galuega e pei o le tusitusi lima, ae faamoemoe i le tamaoaiga sasaa mai o le Atua e faaola ai agaga ma ola loto o tagata ona tupu lea o le ekalesia.
E ui foi ina vevesi lenei vaitau fai mai nisi ua matitiva tagata ona o lotu, ae manatua foi o le taeao o le atunuu e faasualua i le faatamasoalii ae o taeao faale-Atua ma Lana suaalofi e suamalie ma taumasuasua pea.
E matagofie viiga o le Atua na saunia e le aulotu fou, ae na apoapoai le afioga i le Sea ia saga toaaga pea e pepese talu ai o le latou misionare e talenia tele i faiva o musika. Sa faapea foi ona iai le aao mafola o le aufaigaluega ma le sinoti e ala i le foai mo le amatalia o le aulotu fou.
O le aulotu fou i Ashburton e fai matagaluega faatasi i Halswell i lalo o le taitaiga a Rev Poasa Leau, seia aulia le Koniferenisi ia Iulai, ona maua lea o se latou faifeau tofia.
Na mae’a le sauniga ona mapu atu lea i le hall mo le taumafataga tele, ma o le failautusi o le aulotu, susuga Voli Po’a sa fai lava ma fofoga o le aso tuupoina na vaavaalua ma le susuga i le misionare, Rev Leauma Faalafi.
Na faamalieina le mamalu na aofia i tapenaga ma sauniuniga uma o le aso, e ui o se aulotu fou toe toagaogao.
Na tauaaoina foi e le aulotu ia faaaloaloga mo le afioga i le Sea faapea le aufaigaluega uma o le sinoti, aemaise le susuga misionare EFKS ma le susuga i le Epikopo sa auai, faatofusia foi nai faifeau malolo aemaise le mafutaga a tagata Samoa i totonu o Ashburton.
O le manulauti o lea aso, o le saunoaga mulimuli a le Sea o le sinoti, “Ia onosai, toaaga e fai le lotu, e iti ma tamatama outou ae ia lototetele i le Alii”, na ia saunoa faamanuia foi i le susuga i le failautusi, Voli Po’a ina ua tutulu le failauga i lana lauga matagofie faamalie loto i le aofia e tusa ai ma le aso, ina ia aua ne’i fefe e faia ma foai e le Atua upu e faagaganaina ai lona gutu, ae amuia foi lenei auauna. O le fetalaiga Leulumoega Levaogogo Tiata mai le matagaluega Porirua sa fai ma sui o le valaaulia e tali fuaitau i le aulotu fou i Ashburton e tusa ai ma le faafale upoluga o aso faapenei, ona faaiu lea e le taitai i le tatalo ma ua tatala le filialii, taape fiafia i le faatasi mai o le Atua.
Ia sagai ane laia ai o le tai i le susuga i le misionare, Rev Leauma Faalafi ma le faletua Fiapalagi faapea le aulotu fou Ashburton, ia manuia la outou faatamasoalii.
