2 Korinito 1:8 “Aua le au uso e, matou te loto ina ia outou iloa lo matou puapuaga na oo mai ia te i matou i Asia, na silisili ona mafatia tele ai o i matou, e lei au iai lo matou malosi, na oo lava ina matou masalo ai a matou oti.”
Aisea lava ua mafaia ai e le Aposetolo ona taofiofi mamau i lona faatuatua i totonu o puapuaga e tele sa ui ai? Na oo lava ina vaai o latou mata i le oti ua aga mai ia te i latou, ae le mafai lava ona faafiti pe solomuli? Sa sauni foi i taimi uma e tuuina atu o latou ola e aunoa ma se fefe.
E iai taimi faapea o lo tatou soifuaga e luluti mai ai faafitauli ma taomia ai lo tatou taumafai, ma faapouliuligia ai mata faaleagaga o le toatele.
O lagona atuatuvale ma le le mautonu e tupu ai le fa’atu ma ainiumea ai ma faapea; ua lava lea. Pei o upu o le pese, ua fiu lo’u taumafai. Ua e faalogo atu ua tau pasae lou ulu, pe faalogo atu ua tau nofo lau mānava, e pei ua e faavalevalea, leiloa poo fea a faasaga i ai mo se fesoasoani.
E faapea lagona na oo i ai le Aposetolo o Paulo i le tele o taimi. Faafofoga foi, (2 Korinito 11) ua matua tele i sasaina, ua tele na tuuina i falepuipui, ua atulasi i oti, ua atulima na sasaina o au e Iutaia, e taifagafulu i le iva o’u ta, ua atu tolu na sasaina o a’u i laau, ua tasi le fetogia o a’u i maa, ua atu tolu ona malaia o a’u i folauga sa ou iai, ua atoa le po ma le ao sa ou i le vasa; ua atu lasi a’u malaga se manu a a’u leaga i vaitafe, se manu a’u leaga i e faomea, se manu a’u leaga i tagata o lo’u lava nuu; se manu a’u leaga i tagata o nuu ese, se manu a’u leaga i le aai ….”
O le fesili, o ai se isi o tatou e mafaia ona tatali nei mau puapuaga e aunoa ma le afaina ai o tatou mafaufau? Tailo pe iai se isi. Ae aisea ua mafaia ai e lenei tagata ona tauave i lona tino nei mau puapuaga? O le tali, ona ua faamaonia e Paulo le moni o le talalelei a Iesu Keriso.
Mo tatou ua ta‘ua o tagata faatuatua, pe mafai ea ona tatou ola i se soifuaga faapea? Ioe, e mafai. Atonu tatou te le oo i puapuaga sa feagai ma Paulo, ae e iai faafitauli o loo tatou feagai, e faavaivaiina ai lo tatou alualu mo Iesu, ma lafoai ai le mataupu a Keriso ma faapea ane, e faigata, e le gafatia e se tasi ona savali i lea savaliga.
Afai la o e iai i se vaitau faigata faapea o le olaga nei, o nisi nei o mea e fesoasoani ia te oe ina ia faigofie ona mauaa lou faatuatua, e tusa pe faigata tofotofoga e oo mai.
1. Ta‘u i le Atua ua e mafatia: O le uiga masani o tatou, e vave ona osotu i luga ma faaseā pe a tutupu faafitauli. Pe faasalalau solo lou ita, ma ta‘uvalea ai oe i ni uiga poo ni tala e fai i taimi e mafatia ai. Fai mai le Salamo 62:8, “… Ia outou momoli atu o outou loto i ona luma; o lo tatou malu o le Atua lea”. Aua e te taumafai e soifua faafoliga ma faapea, o loo sologa lelei mea uma. Manatua, e le mafai ona e nanaina pea ou mafatiaga, e iai lava le taimi e pasae ai. A lē pa agai i le tina o le aiga, e faasasao i le fanau, pe te‘i ua lavea ai se isi o lau fale faigaluega, poo le afaina ai lava o oe. Fai mai le fai-Salamo, ia momoli i le Atua. Faailoa i le Atua e ala i le tatalo. Ta‘u i le Atua, o ia tatou te malu ai.
2. Saili fesoasoani: O nisi taimi, a afaina oe, aua e te musu e talanoa i se isi tagata. Aua le manatu e leai se isi e malamalama ia te oe, pe leai se latou pisinisi i ou tiga. Pe tupu foi le ma, ma oo ina vavaeesea mai oe mai nisi e te latalata iai. E tatau na talanoa i sau uo, poo se isi e tomai ma e faatuatuaina. Kalatia 6:2 “ia outou fesuiai ia outou avega e ave, ma ia faapea na outou faia le tulafono a Keriso.” O le fesuiai, o le faamama avega ma saili fesoasoani. O le mea lea e tatau i soo se tagata, aua e oo uma tatou i faafitauli. E leai se isi o tatou e alo mai mea faigata e tutupu i le olaga o loo tatou iai, e leai foi se isi e tu faamauga, tatou te manaomia uma le fesoasoani.
3. Taulai le vaai ia Keriso: e faigofie ona maua tatou i le faanoanoa ma le popole, ma taulai ai o tatou mata i o tatou faafitauli. O le a tilotilo i ou tiga, ma manatu ua faigata tele. O le tele o taimi e taulai ai lau vaai i ou faafitauli, o le a foliga tetele ma lapopoa ai ou faafitauli, ae ua leai se avanoa e te faatagaina ai le Atua e fesoasoani ia te oe. Ae afai e taulai i le Atua, o le a tele le Atua i totonu o lou loto, ma faateteleina lou faatuatua, ae avea ou faafitauli pei ni loi. Ua faaitiitia faafitauli i lau vaai, ma faaitiitia ai ma le popole.
O laasaga nei sa malamalama lelei i ai le Aposetolo o Paulo, aua o loo atagia i ana tusi. Sa faatuatua ma faalagolago i le manuia o le Atua. E lei faafiti pe fefoifoiai, a ua tautino, ‘ou te mafaia mea uma lava e ala i le faatasi mai o le Atua.” Uso e, ia mausali le faatuatua. Soifua.
