O nisi sa tuli faasalaga ma ua magalo mai le falepuipui ua latou faatu nei se sosaiete ua faaigoaina o le Gauigana‘a Society e fesoasoani ai ia i latou sa nofosala ia foia faafitauli o loo latou fetaia‘i pea ma mafua ai ona toe solitulafono ma toe ulufale ai i le falepuipui.
O le afioga Tofilau Lupematasila Nanai Faamanu Ivara o se tamalii e lauiloa i lona tomai i le aganuu aemaise pe a tu tootoo i ni malaga sii poo ni faalavelave tu o nuu ma itumalo aemaise o le atunuu.
O se tamalii foi ua iloa i nisi o galuega sa tautua ai i le Malo o Samoa, ae faapea foi i faigamalo a Amerika Samoa. E lē natia o ia foi sa molia e leoleo faatasi ai ma nisi o lo latou nuu o Falelatai i ni tausaga ua tuanai ma faamaonia ai i moliaga e fesootai ma se faalavelave na aafia ai se maota o se tasi o matai tāua o le afioaga.
Na tuli lona faasalaga i le falepuipui faatasi ai ma isi sa latou molia faatasi ae o nai tausaga ua tuanai atu nei na magalo ma toe foi mai ai i le saolotoga masani o loo sapi ai le toatele o le atunuu.
Ua ia faaalia o le fuafuaga e faatu se sosaiete ona o le tele pea o mataupu ua tutupu ma aliali mai ua aafia ai pea pagota poo nisi o loo tuli faasalaga. O lana pitolaau autu e pei ona faaalia e Tofilau o le lagolago lea i le Malo i le tulaga o loo ua aliali mai pea o le faatuputupulaia o soligatulafono.
O le mae‘a o se fonotaga a lenei tamalii ma sui o le pulega o falepuipui, le matagaluega o leoleo ma le Minisita o nei matagaluega faapea le afioga i le Palemia, na tuuina atu ma le lagolago i le faatuina o le sosaiete o le Gauigana‘a O le masina fou o Fepuari o le a amata ai loa ona faatino ona tiute o le galulue faatasi ma le pulega o falepuipui e saili se fofo i le faafitauli o le sosola ese o pagota mai le falepuipui.
O le sosaiete foi lenei o le a ave i ai faitioga ma faaseā a pagota i ni mataupu e aafia ai o latou aiā tatau, ona na faaalia e Tofilau o le tasi lava lea o mafuaaga ua mafua ai ona tutupu mai pea faaletonu i alii ma tamaitai pagota o loo tuli faasalaga.
Ua agai foi tapenaga o galuega a le sosaiete i le faia o ni fesootaiga ma i latou sa tuli faasalaga i le falepuipui ma ua magalo ina ia fesoasoani ai e faaitiitia le toe solilia o le tulafono ma toe iu atu ai ile falepuipui.
O le faamatalaga mai le sosaiete e faapea o le 60 i le 70 pasene o pagota o loo iai nei i Tafaigata oi latou ua toe solitulafono.
O le mau a le sosaiete e iai le faafitauli sili ona faigata ua molimauina ua tuputupu pea ma ua sosolo, o le faatasitasi lea o i latou sa tuli faasalaga aemaise i solitulafono mamafa e pei o le talepe fale ma le gaoi ona foliga lea ua latou galulue faatasi e faatino pea nei ituaiga o soligatulafono.
Fai mai le sosaiete lenei o le autu ua mafua ai pea nei solitulafono ona o loo lape le silasila i ni polokalame e toe saga tapu‘e ai le ola o nei pagota pe a magalo mai i tua.
