O le faaitiitia o faama‘i lē pipisi, o le fesoasoani i le soifua maloloina lautele o le afioaga ma le uunaiga o atina‘e o taaloga i tupulaga talavou, o nisi nei o mafuaaga na agiga lava i le tatalaga aloaia o se fale taalo poo se fale koleni muamua ua faatūina faapea i Samoa ma o le afioaga o Solosolo lea ua faatino ai lea faamoemoe.
O sui lava o le afioaga na tumutumu i le Aso Toonai i lea sauniga, ona o le fia molimauina o le taumafaiga na faapea ona taulamua ai le kalapu lakapi o le Afa Luko a le afioaga o Solosolo. Faaalia e le sui o le afioaga, o le fale taalo lenei ua fausia ona o le manaoga e iai se nofoaga e agai i ai le afioaga i ona tupulaga i taaloga eseese.
Ua faapea foi ona tatala le avanoa mo tamā ma tina matutua o le afioaga e agai ane i lenei fale mo le faatautaiga o faamalositino, ma na iai uma le afioaga e tapuaia lenei taumafaiga.
O le tupe na saili e le kalapu lakapi na agai ai se latou faigamalaga i Niu Sila, ma o sui lava o Solosolo na maua le avanoa e velo ‘aso ai i lea sailigatupe na iai uma lava mo le faatinoga o lenei faamoemoe.
E toatele lava kalapu lakapi e agai i fale faamalositino i le talafatai o le taulaga auā koleniga ma sauniuniga o taaloga, ae o se kalapu muamua lenei ua mafai lava ona faatū i totonu o se nuu sa latou fale koleni auā fanau a le afioaga latou. E $25,000 le tau atoa o lenei galuega ua faapaiaina, ma o le tupe lea na maua i Samoa faapea ai le malaga e pei ona ta‘ua i Niu Sila. O masini e faatino ai faamalositino na faatau ai aemaise o le fausia o le fale mo lenei faamoemoe.
Ta‘ua e nisi o sui o le afioaga le aogā tele o lenei atina‘e ma ua fesoasoani foi i le faaitiitia o gasegase lē pipisi ua vaaia le taatele i lenei vaitau i tagata o le afioaga.
