Faatū se faafanua mo le faamauina o faamatalaga i taimi o faalavelave

Ua iai se ituaiga tomai fou e fesoasoani i le faataatitiaga o faafanua e mafai ona agai i ai le malo mo ana atinae, ma o se tomai ua aumai i se fesoasoani a le Malo o Ausetalia.
Aisea e tāua ai le maua o lenei ituaiga tomai ma polokalame televavave faapea, o le fesili lea e lāgā i le faatautaia ai o nei ituaiga aoaoga ma le aumai ai o ia fesoasoani.
O le tali i le molimauina o lenei fesoasoani, o nofoaga e pei o le malaevaalele faavaomalo i Faleolo e tāua le iloa lelei o le saogalemu i le faaaogāina i taimi uma.
E tāua le iloa pe lē o iai ni lologa e ono aafia ai lea nofoaga aemaise o le tulaga e ono afaina ai i faalavelave faalenatura.
E lē gata i lea o le iloa e le ofisa o le vaaitau, ma le tele o matagaluega e aafia i le tali o faalavelave faalenatura o nofoaga e agai i ai mo fesoasoani i taimi o faalavelave faafuasei, ua manaomia ai lava faafanua faapenei aemaise o le tali e mafai ona avatu i ai pe a te‘i ua sui faafuasei le tau pe ua vaaia foi le foufou mai o ni faalavelave tetele faapea.
O loo ua faatautaia foi aoaoga mo matagaluega ma faalapotopotoga a le Malo ina ia iloa lelei galuega toe faaleleia i le taimi o faalavelave tetele faalenatura. E pei o auala e agai i ai paipa e ta‘i mai ai le suavai i maota ma laoa pe a faaleaga nofoaga ua faataatitia ai nei paipa.
O ā nofoaga e tatau ona unaia le faamaualuga o taligalu e tali ai tafega, ae o ā nofoaga e agai i ai mo le totōina o taumafa i taimi e tulai mai ai faalavelave tetele nei?
O le faamatalaga a le Komesina o le Malo o Ausetalia, Dr Stephen Henningham, ‘O fuafuaga uma lava nei o se galuega tele lenei a le Malo o Ausetalia mo malo laiti o le Pasefika ina ia mafai ona galulue mo se suiga i le lumanai aemaise o le saogalemu ai ma le faaauau ona soifua ma nonofo tagata o atumotu i o latou atunuu e ui ina afatia i mala faalenatura.’
O Samoa la le isi atunuu ua unaia ai nei suiga ma le aoaoina o le tomai ina ia mafai ai lava e tagata o Samoa ona tali atu i soo se auala poo soo se luitau e tulai mai i taimi faigata ia.
O faamatalaga uma i nofoaga e pei o malaevaalele, ua amata nei ona faaputu ma faamauina auā le faafanua tele lenei ua amata faatuina, ma o le a maua uma lava e le ofisa o le vaaitau, o le ofisa o tali o faalavelave faalenatura, o ofisa o le malo ma le puipuiga lea faafanua ma mafai ona fai i ai suiga a o faagasolo galuega faaleleia nei mai i lea aoaoga.