Ua taulai nei le silasila a le pulega o le Ekalesia Worship Center i Samoa e faatu se latou pisinisi e faafaigaluega ai tupe poo se financial investment company, ina ua maea ona lesitala faaletulafono ma ave i ai e le Malo le laisene e faagaioia ai le latou kamupani ua faaigoaina o le King Financial Investment Company. O le faamoemoe o lea pisinisi e pei ona faaalia e le taitai o le ekalesia, le susuga i le faifeau o Viliamu Mafo’e, o le fia maua lea o se isi auala e saili ai tupe mo le galuega faamisionare a le Worship Center i atunuu i fafo, ona e le taugofie manaoga tau tupe o lea auaunaga. O le tasi itu o le a avea le pisinisi ma fesoasoani mo tagata lotu o le ekalesia lea o le a teu faafaigaluega a latou seleni i le kamupani.
O le vaiaso na tea nei sa tauaofia ai le fono tele a lea ekalesia e tai lua tausaga ma usuia lea sa faasilasila aloaia ai lenei taumafaiga. E lei mafai e le susuga Viliamu Mafo’e ona faailoa mai le aofaiga o se tupe ua iai e amata ai le pisinisi, seiloga e maioio muamua lea tulaga i luma o le fonotaga o loo auai le silia i le 400 o usugafono mai atunuu i fafo e pei o Ausetalia, Amerika Samoa, Niu Sila, Hawaii, Amerika, ma Samoa nei.
I se talanoaga ma le taitai o le ekalesia i luga o le telefoni, na ia taua ai sa tuai ona faalauiloa lautele lea fuafuaga tau atinae a lana ekalesia ona sa faatali i le lesitalaina o le kamupani, peitai ua talafeagai le valaau atu a le tusitala ma le maua foi o le lesitala. E manino mai i le finagalo o le faafeagaiga e lei iai se manatu o le ekalesia e natia le latou taumafaiga, aua o ni galuega lelei uma mo le atinae o le ekalesia aemaise e manuia ai ma le atunuu.
O loo faaautu le fonotaga o lenei tausaga i le siitia o le numera o tagata lotu ona o le fia atinaeina o le ola faaleagaga o tagata. Faaalia e Viliamu o le taimi lenei o le seleselega a le Alii e ao ona faatino ai galuega uma mo le siitia o le ola faaleagaga o tagata. O se tasi o atinae a le ekalesia Worship Center i Samoa, o se faletelevise mo polokalame faalelotu o le a tatala i le masina fou o Aukuso. Sa iai le fuafuaga e tatala i le masina nei i le taimi o le fono tele a le ekalesia peitai ua tuai ona taunuu nisi o masini mo lea faamoemoe.
E malosi le alaata o le a faaaoga e le televise a le ekalesia ona o le a oo atu lona malosi i nisi o afioaga i Savaii faapea nuu i tua i Upolu. O loo iai foi se isi atinae a le ekalesia o se leitio ua faaigoaina o Uaga o Faamanuiaga poo le Showers of Blessings o loo faagaioia mai Mulinuu i le nofoaga autu o le ekalesia e sosoo ma le faletalimalo o le Mellenia Hotel. O loo fuafua foi le ekalesia e fausia so latou malumalu fou ma se nofoaga autu o le ekalesia i luga o lo latou fanua o iai nei le fale faasalalau poo le leitio.
