Ekalesia Fou a le Harbour Praise ua faatuina i Melepone Ausetalia

Ua 10 nei tausaga o le lotu a le ekalesia o le Harbour Praise i Aukilani i lalo o le taitaiga a le susuga i le faafeagaiga ia Poni Fonoti ma le faletua ia Lola Fonoti. 

Ae o totonu o le sefulu tausaga lea sa tele ai nisi o avanoa ma nisi o tagata sa iai lo latou lagona ua tatau ona faatuina nisi ekalesia i lalo o le faamalu o le Harbour Praise i totonu o Niu Sila atoa faapea ai ma Ausetalia.

Ae i le lagona o le susuga i le faafeagaiga ia Poni Fonoti ma le faletua, e iai lava le taimi o le Atua e amata ai nisi ekalesia, ae e tatau ona aoao lelei tagata ina ia avea ma taitai lelei auā le galuega a le Atua. I le talitonuga o le susuga i le faafeagaiga a lelei ona faafailele le olaga o le taitai e ala i le aoaoina i le upu a le Atua e alu atu foi e amata le lotu ua iloa ui i faigata ma fita o le galuega. Ma o lea sa fai ai ana aoga Tusi Paia i le 4 tausaga ina ia aoao lelei tagata lolotu ma tagata ua iai le vaalaauina a le Atua e avea ma faifeau. 

Ua mae’a le aoga ma ua toatele nisi sa a’otauina i totonu o le aoga a le susuga ia Pastor Poni Fonoti o lea ua malaga atu i Ausetalia ma nonofo ai a’o nisi o loo lolotu i nisi o ekalesia faapea foi ma totonu o lana galuega o loo galue ai i Magele. O le avanoa ua tatalaina mai i Melepone i Ausetalia o le avanoa ma le taimi ua aumai loa e le Atua e faatuina ai se isi fata faitaulaga i lalo o le faamalu o le Harbour Praise. Lea sa malaga ai loa le susuga i le faafeagaiga ia Poni Fonoti ma le faletua faapea le komiti o le lotu i Magele e momoli le atolaau a le Atua i le fata faitaulaga lea ua amataina i Melepone. Ta’ua e le susuga i le faafeagaiga le sau o le Atua i lona taimi, auā e taunuu atu e lima aiga ua amata ai le galuega i Melepone, ae ua iai ma nisi o ekalesia ma susuga i faafeagaiga sa latou molimauina le amataina o le galuega fou i Ausetalia. O aiga nei, o aiga e lē o iai ni ekalesia o galulue poo lolotu ai, ae o lea ua tafa so latou finagalo ma fai le latou filifiliga ua tatau ona agai mai e amata le ekalesia i le isi itu o Melepone. Ma o le fiafiaga sili lea i le susuga i le faafeagaiga ia Poni Fonoti ona o avanoa o loo molimau ai le upu a le Atua mo agaga o tagata o loo leiloloa ma le faaolataga, aemaise ai o le Misiona lea o loo fai ma fu’a taualuga i totonu o lana galuega, ia saili mai agaga o tagata e lē o galulue i nisi o ekalesia, e aumai e galulue i totonu o lana galuega.

E mae’a le tatalaina o le lotu i le isi itu o Melepone a’o lea ua fuafua le isi ekalesia e tatalaina i le isi itu o Melepone lava ona ua iai tagata ua fia galulue i le ekalesia ae o le faalavelave e mamao le mea e nonofo ai. O lea ua autasi ai se lagona o nei aiga ma le susuga i le taitai o le ekalesia ia Pastor Poni Fonoti, o Novema i le tausaga nei o le a tatala ai le isi lala o le lotu mo latou. 

O le susuga ia Pastor Fuimaono Faletolu ma le faletua ia Palepa o lea ua faifeau nei i le ekalesia fou o le Harbour Praise i Melepone. Ua iai foi le faamoemoe o le amataga o le tausaga fou e faatuina ai le lotu i Manurewa i nisi o aiga ua tapenaina e le Atua mo lana galuega. Ma ua faasolosolo lava polokalame a le Atua i totonu o le ekalesia ina ia faasooina lana Misiona sa amataina ai le galuega. 

E toatele foi i latou o loo valaau mai i Brisbane i Ausetalia mo se isi galuega, ae i le taimi nei o loo nofo tatalo pea le ekalesia o le Harbour Praise i Magele i se taimi ma se aso e ono amata ai le lotu i lea itu o Ausetalia.