O se moemitiga a le Tofa Semau Faamau Levi ina ia toe foi i lona afioaga e fai se pisinisi auā le tautuaina o lona aiga, nuu, itumalo ma le atunuu. Na ia fesiligia ai se tasi o lona aiga, le Tofa Matuavao Sepulona, ina ia faia se la pisinisi faapaaga e faatino ai lea auaunaga i totonu o lo latou afioaga.
O le Aso Faraile o le vaiaso na tea nei, 26 o Iulai 2013, na faataunuuina ai lea faamoemoe i le afioaga i Saleaula i Savaii. Na tatala aloaia ai se atinae fou faapisinisi, o se Pamu Penisini ua faaigoaina o le ‘Soul of Samoa Enterprises’, ma se Fale Tamea ua faaigoaina o le Laundry Mate, faapea foi ma le Fale Kofe ua faaigoaina o le Mase’s Café.
Na ta‘ua e le Tofa Semau, o le agaga maualuga ma le faamoemoe, ia taumafai e faatosina Turisi, ma faatino se auaunaga mo le nuu, aemaise le itumalo ma le atunuu, ia maua ni galuega a alo ma fanau a le afioaga.
Sa faatumuina luga o le Lava i le afioaga o Saleaula i lea aso o le faamoemoe; na auai atu ai le Afioga i le Fofoga Fetalai, Laaulialemalietoa Leuatea Schmidt, ma sa faia ai sana saunoaga faapitoa o le aso.
Faaalia ai lona mitamita ua avea nei atinae fou ma siitiaga o le tulaga manuia o Savaii, ma sa ia momoli ai le faafetai ma le faamalo ona o le tofa ua a‘e, auā o ia o se tasi o faipule o le motu tele. Sa ia faaalia ai ua lē auai atu le Afioga i le Palemia ona sa malaga i atunuu i fafo, ae ua fai o ia ma sui o le Palemene.
O le Tofa Semau U‘a Iafeta Semau, le tuagane o Semau Faamau, sa fai ma Fofoga o le aso. O le faafeagaiga o le Ekalesia Metotisi i Saleaula, Rev Tasi Aiono, sa ia taitaiina le sauniga lotu, ma lona faletua ia Luatasi sa ootiina le lipine.
I le saunoaga a le Tofa Semau Faamau Levi, le tamaitai pule o le pisinisi, sa ia ta‘ua ai, “Ina ua fai le suiga o le auala a le malo, sa ou manatu ai, o le a tele aiga o le a la‘u mai taavale ona o lea suiga. Sa ou mafaufau ai loa, o Savaii e tau leai ni pamu penisini. O le mafuaaga lea na a‘e ai se manatu, ma talanoa ai loa ia Matuavao mo lea faamoemoe”. Sa ta‘ua foi e Semau, e latalata i le $400,000 le tau aofai o le tino i tupe na faaaluina i le faamoemoe.
Ta‘ua foi e Semau Faamau, sa ia talosagaina le saofaiga a matai o le afioaga a Saleaula, mo se faatagaga e tatala ai le Pamu Penisini i le Aso Sa, auā e leai se pamu penisini i totonu o Savaii e tatala i le Aso Sa, na o nisi e tatala i le taeao.
O le Tofa Levao Foti, na fai ma sui o le afioaga e tali atu i le lagolagoina o le faamoemoe o le atinae, ua maua ai galuega a tamafanau a Saleaula. Sa faaalia le lagolagoina e le nuu ma aiga o le atinae ma le tatalaina o le pamu i le Aso Sa, e pei ona talosagaina e le tamaitai pule.
Sa auai sui o pisinisi o le afioaga faatasi ai ma nuu latalata ane, e pei o le Savaii Lagoon, Taito Tanu Beach Fale, Leota Lu ma nisi sa fai ma sui.
O le faletua ia Lilia Sagala, o se tasi o uso o le tamaitai pule, sa malaga faapitoa i Samoa mo le 3 tolu masina mai Niu Sila, e fesoasoani i tapenaga o le atinae fou, ma na faamatala Lilia, “O le Aso Sa muamua lava na tatala ai le pamu penisini, le aso 28 o Iulai, sa vaaia ai le pisi tele o lenei auaunaga, le pamu penisini”.
